പൊതുസദ്യ ഒഴിവാക്കണം; പണമിടപാട് പരമാവധി ഡിജിറ്റലാക്കണം -മുഖ്യമന്ത്രി

തിരുവനന്തപുരം: കോവിഡ്​ പശ്​ചാത്തലത്തിൽ ഓണത്തിന് പൊതുസദ്യയും ആഘോഷവും ഒഴിവാക്കണമെന്ന് മുഖ്യമന്ത്രി പിണറായി വിജയൻ. ആൾക്കൂട്ടം കൂടുന്ന ആഘോഷപരിപാടികൾ ഒഴിവാക്കണം. ഓണം പ്രതീക്ഷയും പ്രത്യാശയുമാണ്. ബന്ധുഭവനങ്ങളിലെ സന്ദർശനപതിവ് ഇത്തവണ ഒഴിവാക്കണം. വയോജനങ്ങളെ സന്ദർശിക്കരുത്. ഓൺലൈൻ സൗകര്യം ഉപയോഗിച്ച് പരസ്പരം കാണാനും സംസാരിക്കാനും സന്തോഷം പങ്കുവെക്കാനും ശ്രമിക്കണം -മുഖ്യമന്ത്രി പറഞ്ഞു.

കുട്ടികളെയും പ്രായമായവരെയും കടകളിൽ കൊണ്ടുപോകരുത്. വീടുകളിലേക്ക് സാധാനങ്ങൾ ഓൺലൈൻ വഴി എത്തിക്കാൻ ശ്രമിക്കണം. തുണിക്കടകളിൽ വസ്ത്രങ്ങൾ പാകമാണോയെന്ന്​​ ധരിച്ചുനോക്കുന്ന രീതി ഒഴിവാക്കണം. പരമാവധി ഡിജിറ്റൽ പണമിടപാട് നടത്തണം. ഓണത്തിരക്ക് നിയന്ത്രിക്കാൻ പൊലീസിന് നിർദേശം നൽകിയിട്ടുണ്ടെന്നും മുഖ്യമന്ത്രി പറഞ്ഞു.