തദ്ദേശ സ്ഥാപനങ്ങളുടെ ഷോപ്പിങ്​ കോംപ്ലക്സ് പാർക്കിങ്ങിൽ അനുമതിയില്ലാതെ പൊതുയോഗങ്ങൾ പാടി​ല്ല -ഹൈകോടതി

കൊച്ചി: തദ്ദേശ സ്ഥാപനങ്ങളുടെ ഷോപ്പിങ്​ കോംപ്ലക്സുകളുടെ മുന്നിലെ പാർക്കിങ്​ മേഖലയിൽ അനുമതിയില്ലാതെ പൊതുയോഗങ്ങളും ധർണകളും നടത്തരുതെന്ന്​ ഹൈകോടതി. ഈ മേഖലയെ അനധികൃത ഓട്ടോ സ്റ്റാൻഡുകളാക്കി മാറ്റരുതെന്നും ജസ്റ്റിസ്​ എൻ. നഗരേഷ്​ ഉത്തരവിട്ടു.

പെരുമ്പാവൂർ നഗരസഭയുടെ യാത്രി നിവാസ് ഷോപ്പിങ്​ കോംപ്ലക്​സിലെ കടമുറികൾ വാടകക്കെടുത്തവർ നൽകിയ ഹരജിയിലാണ്​ ജസ്റ്റിസ് എൻ. നഗരേഷിന്‍റെ​ ഉത്തരവ്​. തങ്ങളുടെ ഷോപ്പുകളുടെ പാർക്കിങ്​ ഏരിയയിൽ രാഷ്ട്രീയ പാർട്ടികളും മതസംഘടനകളും പൊതുയോഗങ്ങൾ നടത്തുന്നതിനാൽ സ്ഥാപനത്തിലെത്തുന്നവർക്ക്​ പാർക്കിങ്​ സൗകര്യം ലഭ്യമാകുന്നില്ലെന്ന്​ ചൂണ്ടിക്കാട്ടിയായിരുന്നു​ ഹരജി​.

ഈ വിഷയത്തിൽ മുൻസിഫ് കോടതിയിൽനിന്ന്​ അനുകൂല ഉത്തരവ്​ ലഭിച്ചിരുന്നെങ്കിലും നടപ്പാക്കുന്നില്ലെന്ന്​ ഹരജിയിൽ വ്യക്തമാക്കിയിരുന്നു. പാർക്കിങ്​ ഏരിയയിൽ അനുമതിയില്ലാതെയാണ് പൊതുയോഗങ്ങൾ സംഘടിപ്പിക്കുന്നതെന്ന് നഗരസഭയും വിശദീകരിച്ചു. ഷോപ്പിങ്​ കോംപ്ലക്സുകൾക്ക് പാർക്കിങ്​ ഏരിയ വേണമെന്ന് നിയമത്തിൽ നിഷ്കർഷിക്കുന്നുണ്ട്.

ഷോപ്പിങ്​ കോംപ്ലക്സ് നിർമിച്ചശേഷം പാർക്കിങ്​ ഏരിയ മറ്റ്​ ആവശ്യങ്ങൾക്ക് ഉപയോഗിക്കാനാവില്ല. പാർക്കിങ്​ മേഖല പൂർണമായും പൊതുസ്ഥലമായി വിലയിരുത്താനാവില്ല. ഹരജിക്കാരുടെ കെട്ടിടത്തിന്‍റെ പാർക്കിങ്​ മേഖലയിൽ അനധികൃത പൊതുയോഗങ്ങൾ നടത്തുന്നില്ലെന്നും ഓട്ടോ സ്റ്റാൻഡാക്കി മാറ്റുന്നില്ലെന്നും പൊലീസ് ഉറപ്പാക്കണമെന്നും ഉത്തരവിലുണ്ട്​.