വിചാരണ വേളയിൽ പൾസർ സുനിയെ നേരിട്ട് ഹാജരാക്കണമെന്ന്​ ഹൈകോടതി

കൊച്ചി: നടി ആക്രമണ കേസിന്‍റെ വിചാരണ വേളയിൽ ഒന്നാംപ്രതി പൾസർ സുനിയെ നേരിട്ട് കോടതിയിൽ ഹാജരാക്കുന്നുണ്ടെന്ന് ഉറപ്പുവരുത്തണമെന്ന്​ ഹൈകോടതി. എറണാകുളം സബ് ജയിലിൽ കഴിയുന്ന ഇയാളെ നിലവിൽ വിഡിയോ കോൺഫറൻസിങ്ങിലൂടെ വിചാരണക്ക്​ ഹാജരാക്കുന്ന സാഹചര്യത്തിലാണ്​ ഇക്കാര്യത്തിൽ​ വിചാരണ കോടതിക്ക്​ ജസ്റ്റിസ് കെ. ബാബു നിർദേശം നൽകിയത്​.

വിചാരണ വേളയിൽ കോടതിയിൽ നേരിട്ട് ഹാജരാക്കാൻ നിർദേശിക്കണമെന്ന്​ ആവശ്യപ്പെട്ട് സുനി നൽകിയ ഹരജി അനുവദിച്ചാണ്​ ഉത്തരവ്​.

വിചാരണ സമയത്ത് കോടതിയിൽ ഹാജരാക്കിയാൽ സാക്ഷിവിസ്താരത്തിലടക്കം ഇയാളുടെ വിശദീകരണം ഉടൻ തേടാനും നിർദേശങ്ങൾ സ്വീകരിക്കാനും കഴിയുമെന്നായിരുന്നു സുനിയുടെവിചാരണ വേളയിൽ അഭിഭാഷകന്‍റെ വാദം. ഇതേ ആവശ്യമുന്നയിച്ച്​ വിചാരണ കോടതിയിൽ അപേക്ഷ നൽകിയെങ്കിലും ഫലമുണ്ടായില്ലെന്നും പറഞ്ഞു. നേരിട്ട് ഹാജരാക്കുന്നതിനെ പ്രോസിക്യൂഷനും എതിർത്തില്ല.