മുന്നാക്ക ചെയർമാൻ ഇടത്തും വലത്തും

2013 മാർച്ച്​ 23നായിരുന്നു കാബിനറ്റ്​ പദവിയോടെ ആർ. ബാലകൃഷ്ണ പിള്ളയെ ഉമ്മൻ ചാണ്ടി സർക്കാർ മുന്നാക്ക വികസന കോർപറേഷൻ ചെയർമാനായി നിയമിച്ചത്​. കാറും ഓഫിസും സ്​റ്റാഫുമൊക്കെയുള്ള പിള്ള​യുടെ നിയമനത്തിനെതിരെ ചെറുന്നിയൂർ ശശിധരൻ എന്ന അഭിഭാഷകൻ കേസ്​ കൊടുത്തു. മുഖ്യമന്ത്രിക്കും ചീഫ്​ സെക്രട്ടറിക്കും കോടതി കത്തയച്ചു. പിള്ളയുടെ നിയമനം നിയമവിരുദ്ധമാണെന്നായിരുന്നു 2014 ജനുവരി 17ന്​ അന്നത്തെ നിയമവകുപ്പ്​ സെക്രട്ടറി സി.പി. രാമരാജ പ്രസാദ്​ നൽകിയ റിപ്പോർട്ട്​.

1957ലെ കമ്പനി നിയമം സെക്​ഷൻ 274 ഒന്ന്​ ഡി പ്രകാരമായിരുന്നു പിള്ളയുടെ നിയമനം ചട്ടവിരുദ്ധമായത്​. ഏതെങ്കിലും കുറ്റകൃത്യത്തിൽ ഉൾപെട്ട്​ ആറു​ മാസത്തിൽ കുറയാത്ത തടവുശിക്ഷക്ക്​ വിധിക്കപ്പെട്ടയാളും ശിക്ഷ പൂർത്തിയാക്കി അഞ്ചു​ വർഷം കഴിയാതിരിക്കുകയും ചെയ്യുന്ന വ്യക്​തിക്ക്​ കമ്പനിയുടെ ഡയറക്​ടറോ മേധാവിയോ ആകാൻ കഴിയില്ലെന്നതായിരുന്നു ചട്ടം.

പിള്ളയെ പുറത്താക്കണമെന്ന്​ അതിശക്​തമായി ആവശ്യപ്പെട്ടുകൊണ്ട്​ പ്രതിപക്ഷ നേതാവ്​ വി.എസ്​. അച്യുതാനന്ദൻ ആഞ്ഞടിച്ചു. വി.എസ്​ ബഹളം വെച്ചെങ്കിലും ഉമ്മൻ ചാണ്ടി സർക്കാർ പിള്ളയെ പുറത്താക്കിയില്ല. എന്നാൽ, പിന്നീട്​ പിള്ള ആ പദവി രാജിവെച്ചു. അത്​ വി.എസി​െൻറ പ്രതിഷേധം മാനിച്ചായിരുന്നില്ല. ബാർ ഉടമ ബിജു രമേശുമായി നടത്തിയ ഫോൺ സംഭാഷണത്തിൽ ധനമന്ത്രി കെ.എം. മാണിക്കെതിരെ നടത്തിയ ആരോപണത്തി​െൻറ പേരിലുണ്ടായ വിവാദത്തെ തുടർന്നായിരുന്നു.

പിന്നീട്​, അതേ വി.എസ്​ അച്യുതാന്ദനെ സാക്ഷിയാക്കി പിണറായി സർക്കാർ ബാലകൃഷ്​ണപിള്ളയെ കാബിനറ്റ്​ പദവിയോടെ മുന്നാക്ക വികസന കോർപറേഷൻ ചെയർമാനാക്കി എന്നതാണ്​ കൗതുകം. വി.എസിനെയും കാബിനറ്റ്​ പദവിയോടെ ഭരണപരിഷ്​കാര കമീഷൻ ചെയർമാനാക്കി.