പി.എ. സുബൈറിന് ആർ. ശങ്കർ ദിനമണി അവാർഡ്

കൊച്ചി: കൊല്ലം ആസ്ഥാനമായ ആർ. ശങ്കർ ചാരിറ്റബിൾ ട്രസ്റ്റിന്‍റെ ആർ. ശങ്കർ ദിനമണി പത്രപ്രവർത്തക അവാർഡ് മാധ്യമം കൊച്ചി ബ്യൂറോയിലെ ചീഫ് റിപ്പോർട്ടർ പി.എ. സുബൈറിന്. ഫലകവും ക്യാഷ് അവാർഡുമടങ്ങുന്ന പുരസ്കാരം മുൻ മുഖ്യമന്ത്രി കൂടിയായ ആർ. ശങ്കറിന്‍റെ സമാധി ദിനാചരണത്തോടനുബന്ധിച്ച് നവംബർ ഏഴിന്​ കൊച്ചിയിൽ നടക്കുന്ന ചടങ്ങിൽ മന്ത്രി വി.എൻ. വാസവൻ സമ്മാനിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. നിയമ മേഖലയിലെ റിപ്പോർട്ടിങ് മികവ് പരിഗണിച്ചാണ് അവാർഡ്.

2002 മുതൽ മാധ്യമം പത്രാധിപ സമിതി അംഗമാണ്. നിലവിൽ നിയമ കാര്യ ലേഖകനാണ്. എറണാകുളം തൃക്കാക്കര പുലുക്കുഴി പരേതനായ പി.കെ. അബൂബക്കറിന്‍റേയും സുഹറയുടേയും മകനാണ്. കുസാറ്റ് സ്കൂൾ ഓഫ് ലീഗൽ സ്റ്റഡീസിൽ അസി. പ്രഫസറായ നെഹ്മത്ത് ഷീറിനാണ് ഭാര്യ. കോഴിക്കോട് ബേബി മെമോറിയൽ കോളജ് ഓഫ് അലൈഡ് മെഡിക്കൽ സയൻസസ് വിദ്യാർഥിനി ഫർസീൻ ഫാത്തിമ, തൃക്കാക്കര കാർഡിനൽ ഹയർ സെക്കൻഡറി സ്കൂൾ പ്ലസ് വൺ വിദ്യാർഥിനി മെഹ്റീൻ ഫാത്തിമ എന്നിവർ മക്കൾ.

കേരള കൗമുദി കൊച്ചി ബ്യൂറോ ചീഫ് ടി.കെ. സുനിൽകുമാറും അവാർഡിനർഹനായി.