മൂന്നുമാസം മുമ്പ് തെരുവുനായ് ആക്രമിച്ചത് വീട്ടുകാരോട് പറഞ്ഞില്ല, ഒരാഴ്ച മുമ്പ് പനിയും വിറയലും; ആലപ്പുഴയിൽ പേവിഷബാധയേറ്റ വിദ്യാർഥി മരിച്ചു

ചാരുംമൂട് (ആലപ്പുഴ): പേവിഷബാധയേറ്റ് ഗുരുതരാവസ്ഥയിൽ കഴിഞ്ഞിരുന്ന നാലാം ക്ലാസ് വിദ്യാർഥി മരിച്ചു. ചാരുംമൂട് പേരൂർക്കാരാണ്മ സബിത നിവാസിൽ ബിനിൽ - ഷീജ ദമ്പതികളുടെ മകൻ സാവൻ ബി. കൃഷ്ണയാണ്​ (ഒമ്പത്​) മരിച്ചത്.

തിരുവല്ലയിലെ സ്വകാര്യ ആശുപത്രിയിൽ ചികിത്സയിൽ കഴിഞ്ഞിരുന്ന കുട്ടി തിങ്കളാഴ്ച വൈകീട്ടാണ് മരിച്ചത്. പറയംകുളം സ്കൂളിലെ നാലാം ക്ലാസ് വിദ്യാർഥിയായിരുന്നു. മൂന്നുമാസം മുമ്പ് കുട്ടി സൈക്കിളിൽ വരുമ്പോൾ തെരുവുനായ്​ ആക്രമിക്കാൻ ശ്രമിച്ചിരുന്നു.

ഈ സമയം കുട്ടി വീഴുകയും നായ ഓടിപ്പോവുകയും ചെയ്തു. കുട്ടിക്ക് നായ കടിച്ചതിന്‍റെ ഒരു പാടുകളുമില്ലായിരുന്നു. പട്ടി ചാടി വീണ വിവരം കുട്ടി വീട്ടുകാരോട്​ പറഞ്ഞിരുന്നുമില്ല. ഒരാഴ്ച മുമ്പ് കുട്ടിക്ക് പനിയും വിറയലുമുണ്ടായതോടെ അടൂരുള്ള ആശുപത്രിയിൽ പ്രവേശിപ്പിക്കുകയായിരുന്നു.