കെ.എം.സി.സി മാനവികത ഉയർത്തിപ്പിടിക്കുന്ന സംഘടന -രാഹുൽ ഗാന്ധി

ന്യൂഡൽഹി: മഹാവ്യാധിയുടെ കാലത്ത്​ മാനവികത ഉയർത്തിപ്പിടിച്ച്​ കെ.എം.സി.സി (കേരള മുസ്​ലിം കൾച്ചറൽ സ​െൻറർ) നടത്തിയ ഉജ്വല സേവനം അഭിനന്ദനാർഹമാണെന്ന്​ രാഹുൽ ഗാന്ധി. ആരോഗ്യ പ്രവർത്തകരെയടക്കം സഹായിക്കാൻ വൻതോതിൽ വിഭവങ്ങൾ സമാഹരിച്ചു വിതരണം ചെയ്ത സംഘടനയെ പ്രശംസിച്ച്​ അദ്ദേഹം കത്ത്​ അയക്കുകയായിരുന്നു.

പ്രതിസന്ധി ഘട്ടത്തിൽ സേവനമനുഷ്ഠിക്കാനു​ം ദുർബലർക്ക് സഹായമെത്തിക്കാനും സംഘടന നടത്തിയ പരിശ്രമങ്ങളിൽ സന്തോഷമുണ്ട്​. വിദേശ രാജ്യങ്ങളിൽ പഠിക്കുന്നവരെ ഉൾപ്പെടെ ചേർത്തുനിർത്തിയ കെ.എം.സി.സി യു‌.എസ്‌.എ-കാനഡ ചാപ്റ്ററിനെ പ്ര​ത്യേകം അഭിനന്ദിക്കുന്നതായും രാഹുൽഗാന്ധി വ്യക്​തമാക്കി.

അദൃശ്യ ശത്രുവിനെതിരായ പോരാട്ടത്തിന് ജീവിതത്തി​​െൻറ നാനാതുറകളിലുള്ളവരുടെ പിന്തുണയും പങ്കാളിത്തവും ആവശ്യമാണ് എന്നാണ്​ ഈ മഹാമാരി ഓർമ്മപ്പെടുത്തുന്നത്. എല്ലാവർക്കും ഈദ് ആശംസ നേർന്നുകൊണ്ടും ജാതി മത രാഷ്ട്രീയ ഭേദമന്യേയുള്ള സൽപ്രവർത്തനം തുടരുമെന്ന പ്രതീക്ഷ പങ്കുവെച്ചുമാണ്​ അദ്ദേഹം കത്ത്​ അവസാനിപ്പിച്ചത്​.