ഓഫീസ് ആക്രമണം: ആരോഗ്യമന്ത്രിയുടെ പേഴ്സണൽ സ്റ്റാഫിനെ പ്രതിചേർത്തു; സ്റ്റാഫിൽ നിന്നും ഒഴിവായ ആളെന്ന് വീണജോർജ്ജ്

കൽപ്പറ്റ: വയനാട് എം.പി രാഹുൽ ഗാന്ധിയുടെ ഓഫീസ് ആക്രമണവുമായി ബന്ധപ്പെട്ട് ആരോഗ്യമന്ത്രിയുടെ പേഴ്സണൽ സ്റ്റാഫിനെ പ്രതിചേർത്തു. പേഴ്സണൽ സ്റ്റാഫിലുൾപ്പെട്ട അവിഷിതിനെയാണ് പ്രതിചേർത്തത്. എന്നാൽ, ഇതുസംബന്ധിച്ച് ആരോഗ്യമന്ത്രിയുടെ ഓഫീസിൽ നിന്നും വിശദീകരണം പുറത്ത് വന്നിട്ടുണ്ട്. അവിഷിത്ത് വ്യക്തിപരമായ കാരണങ്ങളാൽ ഈ മാസം ആദ്യം പേഴ്സണൽ സ്റ്റാഫിൽ നിന്നും ഒഴിവായിരുന്നുവെന്ന് ആരോഗ്യമന്ത്രിയുടെ ഓഫീസ് വിശദീകരിച്ചു.

ആരോഗ്യമന്ത്രിയുടെ പേ്സണൽ സ്റ്റാഫിലെ ഒരാളുടെ നേതൃത്വത്തിലാണ് അക്രമം നടന്നതെന്ന ആരോപണം ​പ്രതിപക്ഷ നേതാവ് വി.ഡി സതീശനും കോൺഗ്രസ് ജില്ലാ നേതൃത്വവും ഉന്നയിച്ചിരുന്നു. ആരോഗ്യമന്ത്രിയുടെ പേഴ്സണൽ സ്റ്റാഫിനെ പ്രതിപട്ടികയിൽ നിന്നും ഒഴിവാക്കാൻ സമ്മർദമുണ്ടെന്നും ആരോപണമുയർന്നിരുന്നു.

ഇതിന് പിന്നാലെയാണ് കേസിൽ അവിഷിത്തിനെ പ്രതിചേർത്തിരിക്കുന്നത്. ​അതേസമയം, കേസിൽ അറസ്റ്റിലായ 19 എസ്.എഫ്.ഐ പ്രവർത്തകരെ കോടതി റിമാൻഡ് ചെയ്തു. വൈത്തിരി സബ്ജയിലിലേക്കും മാനന്തവാടി ജില്ലാ ജയിലിലേക്കും ഇവരെ മാറ്റുമെന്ന് പൊലീസ് അറിയിച്ചു.