വിവാദ പരാമർശം: രാഹുൽ ഇൗശ്വർ അറസ്​റ്റിൽ VIDEO

തിരുവനന്തപുരം: ശബരിമല യുവതീ പ്രവേശന വിഷയത്തിലെ വിവാദ പരാമർശത്തിൽ അയ്യപ്പ ധർമസേന പ്രസിഡൻറ്​ രാഹുൽ ഇൗശ്വർ അറസ്​റ്റിൽ. തിരുവനന്തപുരം നന്ദാവനത്തിലെ ഫ്ലാറ്റിൽ നിന്ന്​ എറണാകുളത്ത്​ നിന്നെത്തിയ പൊലീസാണ് രാഹുലിനെ അറസ്​റ്റ്​ ചെയ്​തത്​. കലാപാഹ്വാനം നൽകിയെന്ന കുറ്റം ചുമത്തിയാണ്​ അറസ്​റ്റ്​. തിരുവനന്തപുരം സ്വദേശി പ്രമോദ് ഡി.ജി.പിക്ക് നൽകിയ പരാതിയിൽ ജാമ്യമില്ലാ വകുപ്പുകൾ പ്രകാരമാണ്​ രാഹുലിനെതിരെ കേസെടുത്തിരിക്കുന്നത്​.

എറണാകുളം പ്രസ്​ക്ലബിൽ നടന്ന വാർത്താ സമ്മേളനത്തിലാണ്​ രാഹുൽ വിവാദ പരാമർശം നടത്തിയത്​. ശബരിമലയിൽ യുവതി പ്രവേശനമുണ്ടായാൽ രക്​തം വീഴ്​ത്തി അശുദ്ധമാക്കി ക്ഷേത്രനട അടപ്പിക്കാൻ തയാറായി 20 പേർ നിന്നിരുന്നുവെന്ന്​ രാഹുൽ ഇൗശ്വർ പറഞ്ഞിരുന്നു. ഇതി​​​​​​​​​​​​െൻറ അടിസ്ഥാനത്തിലാണ്​ പൊലീസ്​ നടപടി. ​

എന്നാൽ, രക്​തം വീഴ്​ത്തി അശുദ്ധമാക്കി ശബരിമല നട അടപ്പിക്കാൻ പദ്ധതിയിട്ടതായി താൻ പറഞ്ഞിട്ടില്ലെന്നും ത​​​​​​​​​​െൻറ വാക്കുകൾ വളച്ചൊടിച്ച്​ രാജ്യ​ദ്രോഹിയാക്കാനാണ്​ ദേവസ്വം മന്ത്രി ശ്രമിക്കുന്നതെന്നും പിന്നീട് രാഹുൽ ഇൗശ്വർ വിശദീകരിച്ചത്. 20 പേർ കൈമുറിച്ച്​ രക്​തം ഇറ്റിച്ച്​ നടയടപ്പിക്കാൻ​​ തയാറായി നിൽക്കുന്നു എന്ന്​ ഫോണിലൂടെ അറിഞ്ഞിരുന്നു എന്നാണ്​ താൻ പറഞ്ഞത്​.

അവരോട്​ അങ്ങനെ ചെയ്യരുതെന്ന്​ പറഞ്ഞതി​​​​​​​​​​െൻറ പേരിൽ വീണ്ടും കേസിൽ കുടുക്കാനാണ്​ ശ്രമം​. ഇതുകൊണ്ടൊന്നും പിന്മാറില്ല. ശക്​തമായി മുന്നോട്ടുപോകും.ചില അവിശ്വാസികളും മാധ്യമങ്ങളും ചേർന്ന്​ കള്ളം പ്രചരിപ്പിക്കുകയാണ്​. എഡിറ്റ്​ ചെയ്​ത വിഡിയോ വെച്ച്​ ആക്രമിക്കാനുള്ള മന്ത്രിയുടെ ശ്രമം ദൗർഭാഗ്യകരമാണെന്നും രാഹുൽ ഇൗശ്വർ പറഞ്ഞിരുന്നു.

നേരത്തെ, ശ​ബ​രി​മ​ലയിൽ ദർശനം നടത്താൻ എത്തിയ യുവതിയെ തടയാൻ ശ്രമിച്ച കേസിൽ രാഹുലിനെ അറസ്റ്റ് ചെയ്തിരുന്നു. തുടർന്ന് കള്ളക്കേസിൽ കുടുക്കിയെന്ന് ആരോപിച്ച് ജയിലിൽ നിരാഹാര സമരം ആരംഭിച്ച രാ​ഹു​ലിനെ തി​രു​വ​ന​ന്ത​പു​രം മെ​ഡി​ക്ക​ല്‍ കോ​ള​ജി​ലേ​ക്ക്‌ മാ​റ്റി. പിന്നീട് കോടതി ജാമ്യം അനുവദിച്ചു.

അതേസമയം, ശബരിമല യുവതി പ്രവേശനവുമായി ബന്ധപ്പെട്ടുണ്ടായ അക്രമസംഭവങ്ങളിൽ പൊലീസ്​ അറസ്​റ്റുകൾ തുടരുകയാണ്​. ഏകദേശം 3445 പേർ സംഭവങ്ങളുമായി ബന്ധപ്പെട്ട്​ അറസ്​റ്റിലായെന്നാണ്​ വിവരം.