ശബരിമല ദർശനത്തിനെത്തിയ രാഹുൽ ഇൗശ്വറിനെ പൊലീസ്​ തടഞ്ഞു

നിലക്കൽ: ശബരിമല ദർശനത്തിനെത്തിയ രാഹുൽ ഇൗശ്വറിനെ പൊലീസ്​ തടഞ്ഞു. നിലക്കലിലാണ്​ രാഹുൽ ഇൗശ്വറിനെ പൊലീസ്​ തടഞ്ഞത്​. ഹൈകോടതി ഉത്തരവില്ലാതെ സന്നിധാനത്ത്​ പ്രവേശിക്കാൻ കഴിയില്ലെന്ന്​ പൊലീസ്​ അറിയിച്ചതായി രാഹുൽ ഇൗശ്വർ പറഞ്ഞു.

പമ്പയിലേക്ക് വിടാനാകില്ലെന്ന് പൊലീസ് അറിയിച്ചതായി രാഹുൽ ഇൗശ്വർ വ്യക്​തമാക്കി. അനുമതി ലംഘിച്ച് പോകാൻ ശ്രമിച്ചാൽ കരുതൽ തടങ്കലാക്കുമെന്ന്​ പൊലീസ് പറഞ്ഞതായി രാഹുൽ ഇൗശ്വർ ആരോപിച്ചു. ദർശനത്തിന് എത്തുന്നവരെ തടയുന്നത് മനുഷ്യാവകാശ ലംഘനമാണ്​. ഇക്കാര്യം ഉന്നയിച്ച്​ ഹൈക്കോടതിയെ സമീപിക്കുമെന്ന് രാഹുൽ ഇൗശ്വർ വ്യക്​തമാക്കി.

സന്നിധാനത്തേക്ക്​ പോയ ബി.ജെ.പി നേതാവ്​ കെ.സുരേന്ദ്രനെ നിലക്കലിലും ഹിന്ദു​െഎക്യവേദി നേതാവ്​ കെ.പി ശശികലയെ മരക്കൂട്ടത്തും പൊലീസ്​ തടഞ്ഞിരുന്നു.