റമദാൻ വ്രതം തുടങ്ങി

കോഴിക്കോട്: കേരളത്തിൽ റമദാൻ വ്രതം ആരംഭിച്ചു. പരപ്പനങ്ങാടിയിൽ റമദാൻ ചന്ദ്രപ്പിറവി കണ്ടതിന്റെ അടിസ്ഥാനത്തിൽ ഞായറാഴ്ച നോമ്പ് തുടങ്ങുന്നതായി വിവിധ ഖാദിമാർ അറിയിച്ചു.

വിശ്വാസയോഗ്യമായ വിവരം ലഭിച്ചതിന്റെ അടിസ്ഥാനത്തിൽ ഞായറാഴ്ച റമദാൻ ഒന്നായി സമസ്ത കേരള ജംഇയ്യത്തുല്‍ ഉലമ പ്രസിഡന്‍റ് മുഹമ്മദ് ജിഫ്രി മുത്തുക്കോയ തങ്ങൾ, പാണക്കാട് സാദിഖലി ശിഹാബ് തങ്ങൾ, സമസ്ത ജനറല്‍ സെക്രട്ടറി പ്രഫ. കെ. ആലിക്കുട്ടി മുസ്‌ലിയാര്‍, കോഴിക്കോട് ഖാദിമാരായ കെ.വി. ഇമ്പിച്ചമ്മത് ഹാജി, മുഹമ്മദ് കോയ തങ്ങള്‍ ജമലുല്ലൈലി, നാസര്‍ ഹയ്യ് ശിഹാബ് തങ്ങള്‍ എന്നിവര്‍ അറിയിച്ചു.

ഒമാൻ ഒഴിച്ചുള്ള ഗൾഫ് നാടുകളിൽ ശനിയാഴ്ച തന്നെ നോമ്പ് തുടങ്ങിയിരുന്നു. റമദാൻ ഒന്ന് ഞായറാഴ്ച ആയിരിക്കുമെന്ന് കേരള ഹിലാൽ കമ്മിറ്റി (കെ.എൻ.എം)ചെയർമാൻ എം. മുഹമ്മദ്‌ മദനിയും വിസ്ഡം ഹിലാല്‍ വിങ് ചെയര്‍മാന്‍ അബൂബക്കര്‍ സലഫിയും അറിയിച്ചു.

സംയുക്ത മഹല്ല് ജമാഅത്ത് ഖാദിമാരുടെ പ്രതിനിധികളായ എ.പി മുഹമ്മദ് മുസ്‌ലിയാര്‍, താഴപ്ര മൊയ്തീന്‍കുട്ടി മുസ്‌ലിയാര്‍, കേരള മുസ്‌ലിം ജമാഅത്ത് ഫെഡറേഷന്‍ സംസ്ഥാന പ്രസിഡന്റ് കടക്കല്‍ അബ്ദുല്‍ അസീസ് മൗലവി, പാളയം ഇമാം വി.പി.സുഹൈബ് മൗലവി, ദക്ഷിണ കേരള ജംഇയ്യത്തുല്‍ ഉലമ ജനറല്‍ സെക്രട്ടറി തൊടിയൂര്‍ മുഹമ്മദ് കുഞ്ഞ് മൗലവി എന്നിവരും ഞായറാഴ്ച റമദാൻ ഒന്നാണെന്ന് അറിയിച്ചു.