രാമനാട്ടുകര അപകടം: സംഘത്തിന്​ അനസ്​ പെരുമ്പാവൂരുമായി ബന്ധം

കോഴിക്കോട്​: തിങ്കളാഴ്ച രാമനാട്ടുകരയിലുണ്ടായ അപകടത്തിൽ മരിച്ച അഞ്ചുപേരും മദ്യപിച്ചിരുന്നതായി പോസ്റ്റുമോർട്ടം റിപ്പോർട്ട്​. അപകടത്തിന്​ കാരണം അമിത വേഗതയാണെന്നും പൊലീസ്​ അറിയിച്ചു.

സംഭവുമായി ബന്ധപ്പെട്ട കൂടുതൽ വിവരങ്ങൾ പൊലീസിന്​ ലഭിച്ചിട്ടുണ്ട്​. 15 അംഗ സംഘമാണ്​ മൂന്ന്​ വാഹനങ്ങളിലായി കരിപ്പൂർ എയർപോർട്ടിലേക്ക്​ വന്നത്​. കൊടുവള്ളി സംഘം കൊ​ണ്ടുപോകേണ്ടിയിരുന്ന സ്വർണം വഴിമധ്യേ തട്ടിയെടുക്കാനായിരുന്നു പദ്ധതി. ദുബൈയിൽനിന്ന്​ ഷിഹാബ്​ എന്നയാൾ കൊണ്ടുവരുന്ന സ്വർണമാണ്​ കൊടുവള്ളി സ്വദേശികൾക്ക്​ ലഭിക്കേണ്ടിയിരുന്നത്​. എന്നാൽ, ഇയാൾ കസ്റ്റംസിന്‍റെ പിടിയിലായതോടെ ഇവരുടെ പദ്ധതികൾ പാളി.

ചെർപ്പുളശ്ശേരി സംഘത്തിലുണ്ടായിരുന്ന രണ്ടുപേരെ കൂടി പിടികൂടാനുണ്ട്​. കസ്റ്റഡിയിലെടുത്ത എട്ടുപേരെ ചൊവ്വാഴ്ച ഉച്ചക്കുശേഷം മലപ്പുറം കോടതിയിൽ ഹാജരാക്കും.

കൊടുവള്ളിയിൽനിന്നുള്ള സംഘത്തെ കുറിച്ചും അന്വേഷിക്കുന്നുണ്ട്​. സി.സി.ടിവി ദൃശ്യങ്ങൾ പൊലീസ്​ ശേഖരിക്കുകയാണ്​​. കസ്റ്റംസും കാര്യങ്ങൾ അന്വേഷിക്കുന്നു​. കൊടുവള്ളി സംഘം തോക്ക്​ ചൂണ്ടിയാണ്​ ഇവരുടെ മുന്നിൽനിന്ന്​ രക്ഷപ്പെട്ടതെന്ന്​ സംഘം മൊഴി നൽകിയിട്ടുണ്ട്​​. ഇതുസംബന്ധിച്ച അന്വേഷണവും നടക്കുകയാണ്​​.

സംഭവത്തിന്​​ പിന്നിൽ വലിയ സംഘമുണ്ടെന്നാണ്​ വിവരം​. ചെർപ്പുളശ്ശേരി സംഘം മുമ്പും കള്ളക്കടത്ത്​ സ്വർണം കവർന്നിട്ടുണ്ട്​. കള്ളക്കടത്തായതിനാൽ പരാതി ഉയരാറില്ല. ചില സംഭവങ്ങൾ സംഘങ്ങൾ തമ്മിൽ ഒത്തുതീർപ്പാക്കുകയും ചെയ്​തിട്ടുണ്ട്​.

25കാരനായ ചരൽ ഫൈസലാണ്​ ചെർപ്പുളശ്ശേരിയിൽ സംഘത്തിന്​​ നേതൃത്വം നൽകുന്നത്​. എറണാകുളം കേന്ദ്രീകരിച്ച്​ സ്വർണം കടത്തുന്ന അനസ്​ പെരുമ്പാവൂരുമായി ഇവർക്ക്​ ബന്ധമുണ്ട്​. അനസിന്​ വേണ്ടി ചരൽ ഫൈസൽ പണം കടത്തിയിട്ടുണ്ട്​. കൊച്ചിയിലെ ബ്യൂട്ടിപാർലർ വെടിവെപ്പിൽ അനസ്​ പ്രതിയാണ്​. ഇയാൾക്ക്​ എറണാകുളം ജില്ലയിലേക്ക്​​ പ്രവേശനം കോടതി വിലക്കിയപ്പോൾ ചെർപ്പുളശ്ശേരിയിലായിരുന്നു താമസം.

പിടിയിലായവരുടെ കോൾലിസ്റ്റ്​ പൊലീസ്​ പരിശോധിക്കുന്നുണ്ട്​. പ്രതികളുടെ വീട്ടുകാർക്ക്​ ഇവർ എങ്ങോ​േട്ടക്കാണ്​​ പോകുന്നത്​, എന്താണ്​ ചെയ്യുന്നതെന്ന്​ തുടങ്ങിയ കാര്യങ്ങളെ കുറിച്ച്​ അറിവില്ലായിരുന്നു.