മറിയക്കുട്ടിയെയും അന്നയെയും കാണാൻ രമേശ് ചെന്നിത്തല എത്തി

അടിമാലി: ക്ഷേമപെൻഷൻ ലഭിക്കാത്തതിന്‍റെ പേരിൽ തെരുവിൽ ഭിക്ഷാടനം നടത്തിയ മറിയക്കുട്ടിയുടെയും അന്നയുടെയും അടിമാലിയിലെ വീടുകളിലെത്തി കോൺഗ്രസ് നേതാവ് രമേശ് ചെന്നിത്തല. ഞായറാഴ്ച ഉച്ചയോടെയാണ് ഇരു വീടുകളിലും ചെന്നിത്തല എത്തിയത്. ഗാന്ധിഗ്രാം ചാരിറ്റബ്​ൾ സൊസൈറ്റിയുടെ ഫണ്ടിൽനിന്ന്​ 1600 രൂപ വീതം രമേശ് ചെന്നിത്തല രണ്ടു പേർക്കും പെൻഷനായി നൽകി.

സർക്കാറിന്‍റെ പെൻഷൻ ലഭിക്കുന്നതുവരെ എല്ലാമാസവും ഈ തുക സൊസൈറ്റി ഫണ്ടിൽനിന്ന്​ അമ്മമാർക്ക് നൽകുമെന്നും ചെന്നിത്തല പറഞ്ഞു. വയോധികരായ അമ്മമാരുടെ ഭിക്ഷാടനം കരളലിയിക്കുന്ന സംഭവമാണ്. ഇവർക്ക് പെൻഷനല്ലാതെ മറ്റൊരു ജീവിതമാർഗമില്ല. ഇവർ ജീവിക്കാൻ ഭിക്ഷാടനത്തിന് തെരുവിൽ ഇറങ്ങേണ്ടിവന്നത് നവകേരളത്തിന് അപമാനമാണ്. സർക്കാർ ഇവരോട് മാപ്പുപറയണമെന്നും ചെന്നിത്തല പ്രതികരിച്ചു.

തെരഞ്ഞെടുപ്പ് മുന്നിൽക്കണ്ട്​ സർക്കാർ ഫണ്ട് ഉപയോഗിച്ച് നടത്തുന്ന പ്രചാരണമാണ് നവകേരള സദസ്സ്​. ഈ പോക്കാണ് പോകുന്നതെങ്കിൽ അടുത്ത തെരഞ്ഞെടുപ്പിനുശേഷം മുഖ്യമന്ത്രിയുടെയും മന്ത്രിമാരുടെയും സ്ഥാനം മ്യൂസിയത്തിലായിരിക്കുമെന്നും അദ്ദേഹം പറഞ്ഞു.

ഡി.സി.സി പ്രസിഡന്‍റ്​ സി.പി. മാത്യു, ഫ്രാൻസിസ് ജോർജ്, ഇ.എം. ആഗസ്തി, ബാബു കുര്യാക്കോസ്, സി.എസ്. നാസർ, സോളി ജീസസ്, ജോൺസി ഐസക് എന്നിവരും ഒപ്പം ഉണ്ടായിരുന്നു.