സീറ്റ് നൽകിയത് രാഷ്ട്രീയ തീരുമാനമെന്ന് ചെന്നിത്തല 

തിരുവനന്തപുരം: ആര്‍.എസ്.പിക്ക് കൊല്ലം സിറ്റിങ്​ സീറ്റ് വിട്ടുനല്‍കിയത് താനും കെ.പി.സി.സി പ്രസിഡൻറായിരുന്ന സുധീരനും മുഖ്യമന്ത്രിയായിരുന്ന ഉമ്മന്‍ ചാണ്ടിയും അടങ്ങുന്ന നേതൃത്വമെടുത്ത തീരുമാനപ്രകാരമായിരുന്നുവെന്ന് പ്രതിപക്ഷ നേതാവ് രമേശ് ചെന്നിത്തല.

അഞ്ച്​ മിനിറ്റ്​ കൊണ്ടാണ് എന്‍.കെ. പ്രേമചന്ദ്രന് സീറ്റ് നല്‍കാനുള്ള തീരുമാനമുണ്ടായത്. എപ്പോഴും കെ.പി.സി.സി എക്‌സിക്യൂട്ടിവ് കൂടി തീരുമാനം എടുക്കാന്‍ പറ്റണമെന്നില്ല. അതൊക്കെ സാധാരണമാണ്. കേരള കോണ്‍ഗ്രസിന് സീറ്റ് നല്‍കാനുള്ള തീരുമാനം കോണ്‍ഗ്രസ് രാഷ്​ട്രീയകാര്യസമിതി അടക്കമുള്ള വേദികളില്‍ ചര്‍ച്ച ചെയ്തില്ലെന്ന സുധീരന്‍ അടക്കമുള്ള നേതാക്കളുടെ വിമര്‍ശനത്തോട് വാർത്താസമ്മേളനത്തില്‍ പ്രതികരിക്കുകയായിരുന്നു ചെന്നിത്തല.

വീരേന്ദ്രകുമാര്‍ പാര്‍ലമ​​െൻറിലേക്ക് മത്സരിക്കുമ്പോള്‍ ഏതെങ്കിലും കാരണവശാല്‍ അദ്ദേഹം പരാജയപ്പെട്ടാല്‍ രാജ്യസഭാ സീറ്റ് നല്‍കുമെന്ന തിരുമാനവും മൂന്നുപേരും കൂടിയാണെടുത്തത്. അന്ന് എത്ര കമ്മിറ്റി കൂടിയെന്നും രമേശ് ചോദിച്ചു. മുന്നണി സംവിധാനം ശക്തിപ്പെടുത്തുന്നതി​െനടുത്ത തീരുമാനമാണിത്. ഇതെങ്ങനെയാണ് ബി.ജെ.പിയെ ശക്തിപ്പെടുത്തുക? ചില രാഷ്​ട്രീയ സാഹചര്യങ്ങളില്‍ അടിയന്തരമായ തീരുമാനങ്ങള്‍ എടുക്കേണ്ടിവരും. അപ്പോഴൊക്കെ പാര്‍ട്ടി ഫോറങ്ങളില്‍ ചര്‍ച്ച ചെയ്യാന്‍ കഴിഞ്ഞി​െല്ലന്നിരിക്കും.

അതുപോലെതന്നെ ശബരീനാഥന് സീറ്റ് നല്‍കിയതും പാര്‍ട്ടി ഫോറങ്ങളില്‍ ചര്‍ച്ച ചെയ്തിട്ടല്ല. പി.ജെ. കുര്യന്‍, വയലാര്‍ രവി എന്നിവരുടെ സീറ്റ് തിരുമാനിച്ചതും തെരഞ്ഞെട​ുപ്പ്​ കമ്മിറ്റി കൂടിയെടുത്ത തീരുമാനമല്ല. നിയമസഭാ ​െതരഞ്ഞെടുപ്പിലേക്ക് സ്ഥാനാര്‍ഥിനിര്‍ണയം, രാജ്യസഭാസീറ്റിലേക്കുള്ള സ്ഥാനാര്‍ഥി നിര്‍ണയം ഇവയൊക്കെ ഇത്തരത്തിലാണ് തീരുമാനിച്ചതെന്നും അദ്ദേഹം പറഞ്ഞു.