രഞ്​ജിത്ത്​ വധം: കൊലയാളി സംഘത്തിലെ ഒരാൾ ബംഗളൂരുവിൽ പിടിയിലായതായി​ സൂചന

ആലപ്പുഴ: ബി.ജെ.പി ഒ.ബി.സി മോർച്ച സംസ്ഥാന സെക്രട്ടറി രഞ്​ജിത് ശ്രീനിവാസ​ന്‍റെ (44) കൊലപാതകവുമായി ബന്ധപ്പെട്ട്​ കൊലയാളി സംഘത്തിലെ ഒരാൾ ബംഗളൂരുവിൽ പിടിയിലായെന്ന്​ സൂചന. ആലപ്പുഴ വെള്ള​ക്കിണർ സ്വദേശിയായ എസ്​.ഡി.പി.ഐ പ്രവർത്തകനാണ് ​പിടിയിലായതെന്നാണ്​ വിവരം.

ഒരാഴ്​ച പിന്നിട്ടിട്ടതോടെയാണ്​ ആറ്​ ബൈക്കിലായി സഞ്ചരിച്ച 12 പേരിൽ ഒരാ​ളെ അന്വേഷണസംഘത്തിന്​ പിടികൂടാനായത്​. കസ്​റ്റഡിയിലെടുത്ത ഇയാളെ വിശദമായി ചോദ്യംചെയ്​തുവരുകയാണ്​. ഇതോടെ, ഒളിവിലായ മറ്റ്​ പ്രതികളെക്കുറിച്ച്​ സൂചനകിട്ടുമെന്ന പ്രതീക്ഷയിലാണ്​ അന്വേഷണസംഘം.

ബൈക്കിലെത്തി കൃത്യം നടത്തിയശേഷം പ്രതികൾ കേരളത്തിന്​ പുറത്തുപോയെന്നാണ്​ അന്വേഷണസംഘത്തിന്‍റെ വിലയിരുത്തൽ. തുടർന്ന്​ തമിഴ്​നാട്​, കർണാടക സംസ്ഥാനങ്ങളിൽ വിവിധ സംഘങ്ങളായി തിരച്ചിൽ നടത്തുന്ന സംഘത്തിന്‍റെ വലയിലാണ്​ ഇയാൾ കുടുങ്ങിയത്​. പ്രതികളെ​ പ്രാദേശികമായി സഹായിച്ചവരടക്കമുള്ളവരെയാണ്​ നേരത്തേ പിടികൂടിയിരുന്നത്​.