ഒമ്പതുകാരിയെ ബലാത്സംഗം ചെയ്​തു കൊലപ്പെടുത്തിയ കേസ്​: പ്രതിയുടെ വധശിക്ഷ ഹൈകോടതി ശരിവെച്ചു

കൊച്ചി​: നിലമ്പൂരിൽ മകളുടെ കൂട്ടുകാരിയും ഒമ്പതുവയസ്സുകാരിയുമായ മദ്​റസ വിദ്യാര്‍ഥിനിയെ ബലാത്സംഗം ചെയ്​ത്​ കൊലപ്പെടുത്തിയ കേസിലെ പ്രതിയുടെ വധശിക്ഷ ഹൈകോടതി ശരിവെച്ചു. പൂക്കോട്ടുംപാടം ചുള്ളിയോട്‌ പൊന്നാംകല്ല്‌ പാലപ്പറമ്പത്ത്‌ അബ്​ദുൽ നാസറിന്​ മ​ഞ്ചേരി സെഷൻസ്​ കോടതി വിധിച്ച വധശിക്ഷയാണ്​ ഡിവിഷൻ ബെഞ്ച്​ ശരിവെച്ചത്​. കൊലപാതകത്തിന് വധശിക്ഷയും ബലാത്സംഗത്തിന് ഏഴുവര്‍ഷത്തെ തടവുശിക്ഷയുമായിരുന്നു സെഷൻസ്​ കോടതി വിധിച്ചത്​. 

2012 ഏപ്രില്‍ നാലിന്​ രാവിലെ ഏഴിനാണ്​ മദ്​റസയിലേക്ക്‌ പോകുകയായിരുന്ന ഒമ്പതുകാരിയെ പ്രതി പീഡനത്തിനിരയാക്കി കൊലപ്പെടുത്തിയത്​. കൂട്ടുകാരിയെ വിളിക്കാൻ പ്രതിയുടെ വീട്ടിലെത്തിയതായിരുന്നു കുട്ടി. ഭാര്യയും മകളും സമീപത്തെ മരണവീട്ടില്‍ പോയതിനാല്‍ തനിച്ചായിരുന്ന പ്രതി കുട്ടിയെ വീട്ടിനകത്തേക്ക്‌ വിളിച്ചുവരുത്തി ബലാത്സംഗം ചെയ്യുകയും ഷാള്‍ കഴുത്തില്‍ മുറുക്കി കൊലപ്പെടുത്തുകയുമായിരുന്നു. മദ്​റസയിലേക്ക്‌ പോയ കുട്ടി തിരിച്ചുവന്നില്ലെന്ന്‌ കാണിച്ച്‌ മാതൃസഹോദരന്‍ നിലമ്പൂര്‍ പൊലീസില്‍ പരാതി നല്‍കിയതിനെ തുടര്‍ന്ന്‌ പൊലീസും നാട്ടുകാരും നടത്തിയ തിരച്ചിലിലാണ്​ മൃതദേഹം പ്രതിയുടെ വീട്ടിലെ ബാത്ത്‌റൂമില്‍ കണ്ടെത്തിയത്​. 2013 ജൂലൈയിലായിരുന്നു സെഷൻസ്​ കോടതി വിധി.

പ്രോസിക്യൂഷൻ ഉയർത്തിയ വാദമുഖങ്ങൾ വ്യക്തമായി തെളിയിക്കാനായിട്ടുണ്ടെന്നും ഇതി​​​​െൻറ അടിസ്ഥാനത്തിലുള്ള വിചാരണക്കോടതി വിധി ശരിവെക്കുന്നതായും ഡിവിഷൻ ബെഞ്ച്​ വ്യക്തമാക്കി. കൂട്ടുകാരിയുടെ പിതാവ്‌ എന്ന നിലയിൽ കുട്ടിക്കുണ്ടായിരുന്ന വിശ്വാസം ദുരുപയോഗം ചെയ്​താണ്​ ​ക്രൂരമായ തരത്തിൽ പീഡനവ​ും കൊലപാതകവും നടത്തിയതെന്ന്​ കോടതി വിലയിരുത്തി. 45 വയസ്സുള്ള ഒരാളാണ്​ ഒമ്പത്​ വയസ്സായ കുട്ടിയെ ഇൗ ക്രൂരകൃത്യത്തിനിരയാക്കിയത്​. കൂട്ടുകാരിയുടെ പിതാവായ പ്രതി തന്നോട്​ പിതാവിനെപ്പോലെ പെരുമാറുമെന്നാകും ആ കുട്ടി പ്രതീക്ഷിച്ചിട്ടുണ്ടാവുക. കുറ്റകൃത്യം മറച്ചുെവക്കാനും തെളിവ്​ നശിപ്പിക്കാനും മൃതദേഹം സെപ്​റ്റിക്​ ടാങ്കിൽ തള്ളാനുമുള്ള ഉദ്ദേശ്യത്തോടെയാണ്​ ആദ്യം കട്ടിലിനടിയിലും പിന്നീട്​ ബാത്ത്​റൂമിലും സൂക്ഷിച്ചതെന്നും വ്യക്തമാണ്​.

ഇത്തരം കേസുകളിൽ സുപ്രീം കോടതിയുടെ മാർഗനിർദേശങ്ങൾ പാലിക്കേണ്ടതുണ്ട്​. ഞെട്ടിപ്പിക്കുന്നതും അതിക്രൂരവുമായ കുറ്റകൃത്യമാണ്​ സമൂഹത്തോട്​ പ്രതി ചെയ്​തത്​. കോടതി​െയയും ഞെട്ടിച്ച സംഭവമാണിത്​. കേസുമായി ബന്ധപ്പെട്ട ഒാരോ സാഹചര്യവും കുറ്റകൃത്യത്തി​​​​െൻറ ആഴം വർധിപ്പിക്കുന്നുണ്ട്​. അതിനാൽ, അപൂർവങ്ങളിൽ അപൂർവമായ കേസാണിതെന്ന്​ വിലയിരുത്തിയ കോടതി വധശിക്ഷ ശരിവെക്കുകയായിരുന്നു.