കേരളതീരത്ത്​ അപൂർവയിനം വെൺകവിൾ ആളയെ കണ്ടെത്തി

തൃശൂർ: കേരള കടൽതീരത്ത്​ അപൂർവ ഇനം 'വെൺകവിൾ ആള​'യെ കണ്ടെത്തി. ചാവക്കാട്​ കടൽ തീരത്തെ മുനക്കടവ്​ ഭാഗത്തുനിന്ന്​ 10 നോട്ടിക്കൽ അകലെയാണ്​ പക്ഷിയെ കണ്ടെത്തിയത്​.

സാമൂഹ്യ വനവത്​കരണ വിഭാഗവും (തൃശൂർ) ബേർഡേർസ്​ സാൻസ്​ ബോർഡേർസ്​ എന്ന 20 അംഗ പക്ഷി നിരീക്ഷണ സംഘവുമാണ്​ കടൽപക്ഷികളുടെ പെലാജിക്​ സർവേ നടത്തിയത്​. വിവിധയിനം കടൽ കാക്കകളും ആളകളുമാണ്​ കടലിൽ കണ്ടുവരുന്നത്​. സംഘം പക്ഷികളുടെ ചിത്രമെടുത്ത്​ മടങ്ങിയ ശേഷം​ ഒരു ആളയുടെ കാലിൽ പ്രത്യേക വളയം ഇട്ടിരിക്കുന്നതായി ശ്രദ്ധയിൽപ്പെടുകയായിരുന്നു​.

മിക്ക ചിത്രങ്ങളിലും ഈ പക്ഷിയുടെ സാന്നിധ്യം കണ്ടെത്തിയതോടെ നടത്തിയ അന്വേഷണത്തിൽ​ കേരളത്തിൽ ഇതിനുമുമ്പ്​ കണ്ടിട്ടില്ലാത്ത വെൺ കവിൾ ആളയാണെന്ന്​ മനസിലായി​. കാലിൽ ഘടിപ്പിച്ചിരിക്കുന്ന വളയത്തെക്കുറിച്ച്​ കൂടുതൽ വിവരങ്ങൾ ലഭ്യമായില്ലെങ്കിൽ, കേരളത്തിൽ ആദ്യമായാണ്​ ഈ പക്ഷിയെ കണ്ടെത്തുന്നതെന്ന്​ പക്ഷിനിരീക്ഷണ സംഘം അഭിപ്രായപ്പെട്ടു. പക്ഷിയുടെ കാലിലെ വളയത്തെക്കുറിച്ച്​ അറിയുന്നതിനായി ബി.എൻ.എച്ച്​.എസ്​ അധികൃതരുമായി ബന്ധപ്പെട്ടിട്ടുണ്ടെന്നും തൃശൂർ സാമൂഹ്യ വനവത്കരണ വിഭാഗം എ.സി.എഫ്​ പി.എം. പ്രഭു അറിയിച്ചു.

സാധാരണ കാണപ്പെടുന്ന ആളകളിൽനിന്ന്​ വ്യത്യസ്​തമായി വെൺകവിൾ ആളക്ക്​ കവിളിൽ തൂവെള്ള നിറവും വാലിന്‍റെ മുകളിൽ ഇളം കറുപ്പ്​ നിറവുമായിരിക്കും. കെനിയ, എ​േത്യാപ്യ, സൗദി അറേബ്യ, ഇറാൻ തുടങ്ങിയ രാജ്യങ്ങളുടെ കടലോരങ്ങളാണ്​ ഇവയുടെ പ്രധാന പ്രജനന സ്​ഥലം. കേരളത്തിൽ കണ്ടെത്തിയതായി സ്​ഥിരീകരിച്ചിട്ടില്ല. ഇന്ത്യയിൽ മഹാരാഷ്​ട്ര, ഗോവ, ലക്ഷദ്വീപ്​ എന്നിവിടങ്ങളിൽ വെൺ കവിൾ ആളയെ കണ്ടെത്തിയിരുന്നു.

സർവേയിൽ 23ഇനം കടൽ പക്ഷികളെ കണ്ടെത്താനായതായി നിരീക്ഷണ സംഘം അറിയിച്ചു. 200ഓളം പക്ഷികളെ എണ്ണിത്തിട്ടപ്പെടുത്തി. അപൂർവ ഇനങ്ങളായ പെട്രീൽസ്​, ഷിയർ വാട്ടർ, ​ട്രോപിക്​ ബേർഡ്​ എന്നിവയെയും കണ്ടതായി അവർ അറിയിച്ചു. സാധാരണ നവംബർ - ഡിസംബർ മാസത്തിൽ നടത്തേണ്ട കടൽ പക്ഷി സർവ്വേ കോവിഡ് പശ്ചത്തലത്തിൽ ഫെബ്രുവരിയിൽ നടത്തുകയായിരുന്നു. റാഫി കല്ലേറ്റുംകര കടൽപക്ഷി സർവ്വേക്ക് നേതൃത്വം നൽകി. സെക്ഷൻ ഫോറസ്റ്റ് ഓഫീസർമാരായ അനിൽകുമാർ, ജോസഫ്, സുനിൽ കുമാർ എന്നിവർ പക്ഷി സർവേയിൽ പങ്കെടുത്തു.