പൊലീസ് സേനയിൽ ട്രാൻസ്ജെൻഡേഴ്സിനെ ഉൾപ്പെടുത്താൻ ശിപാർശ

തിരുവനന്തപുരം: കേരള പൊലീസിൽ ട്രാൻസ്‍ജെന്‍ഡേഴ്സിനെ ഉൾപ്പെടുത്താനുള്ള ചർച്ചകളുമായി ആഭ്യന്തരവകുപ്പ്. ട്രാൻസ്‍ജെന്‍ഡേഴ്സിന് സർക്കാർ ജോലികളിൽ പ്രാതിനിധ്യം നൽകുന്നതിന്‍റെ ഭാഗമായി വനിത- ശിശുക്ഷേമ വകുപ്പ്​ മറ്റു​ വകുപ്പുകളോടെല്ലാം അഭിപ്രായം തേടിയിരുന്നു. ആഭ്യന്തരവകുപ്പിലെത്തിയ അപേക്ഷയിൽ പഠിച്ച് റിപ്പോർട്ട് നൽകാനാണ് പൊലീസിനോട് ആവശ്യപ്പെട്ടിരിക്കുന്നത്. ക്രമസമാധാന ചുമതലയുള്ള എ.ഡി.ജി.പി, ബറ്റാലിയൻ എ.ഡി.ജി.പി എന്നിവരോടാണ്​ ആഭ്യന്തരവകുപ്പ് റിപ്പോർട്ട്​ തേടിയത്​.

ഏതുവിഭാഗത്തിൽ എത്തരം ജോലികൾ ട്രാൻസ്​ജെൻഡേഴ്​സിന്​ നൽകാനാകുമെന്നതാണ്​ പരിശോധിക്കുന്നത്​. എന്നാൽ, ഇക്കാര്യത്തിൽ തീരുമാനമെടുത്തിട്ടില്ലെന്നും പ്രാഥമിക ചർച്ചകൾ മാത്രമാണ്​ തുടങ്ങിയതെന്നും ആഭ്യന്തരവകുപ്പ്​ വൃത്തങ്ങൾ പറഞ്ഞു. ഔദ്യോഗികമായി സർക്കാർ നിർദേശമൊന്നും ലഭിക്കാത്തതിനാൽ പരിശോധനകള്‍ ആരംഭിച്ചിട്ടില്ലെന്ന്​ പൊലീസ് ആസ്ഥാന വൃത്തങ്ങള്‍ വ്യക്തമാക്കി.

ട്രാൻസ്‍ജെന്‍ഡേഴ്സിനെ സേനയില്‍ എടുക്കുന്നത് സംബന്ധിച്ച് ഇന്ത്യയിലെ പല സംസ്ഥാനങ്ങളും ഇതിനകം തീരുമാനമെടുത്തിട്ടുണ്ട്. കര്‍ണാടക പൊലീസിലേക്ക് ട്രാൻസ്‍ജെന്‍ഡേഴ്സിനെ ക്ഷണിച്ചുള്ള പരസ്യം പ്രധാന പത്രങ്ങളില്‍ രണ്ടാഴ്​ച മുമ്പ് പ്രസിദ്ധീകരിച്ചിരുന്നു. എസ്.ഐ, റിസര്‍വ്ഡ് ബറ്റാലിയന്‍ തസ്തികയിലേക്കാണ് അപേക്ഷ ക്ഷണിച്ചത്. 22 അപേക്ഷ ലഭിച്ചു. തമിഴ് നാട്ടില്‍ ഒരു എസ്.ഐ ട്രാന്‍സ് ജെന്‍ഡര്‍ വിഭാ​ഗത്തില്‍നിന്നുണ്ട്​. ഛത്തിസ് ഗഢില്‍ 13 ട്രാൻസ്‍ജെന്‍ഡേഴ്സിനെ കോണ്‍സ്റ്റബിള്‍മാരായി തെരഞ്ഞെടുത്തിരുന്നു. അതിന്‍റെ ചുവടുപിടിച്ചാണ്​ ഇപ്പോൾ ​കേരളവും നീക്കം ആരംഭിച്ചത്​.