മുഖ്യമന്ത്രിയുടെ മകളുടെ കമ്പനി ഐ.ജി.എസ്.ടി അടച്ചില്ലെന്ന പരാതി: റിപ്പോര്‍ട്ട് വൈകുന്നു

തിരുവനന്തപുരം: സി.എം.ആർ.എല്‍ കമ്പനിയില്‍നിന്ന് മുഖ്യമന്ത്രിയുടെ മകള്‍ സ്വീകരിച്ച തുകയില്‍ ഐ.ജി.എസ്.ടി അടച്ചില്ലെന്ന പരാതിയില്‍ അന്വേഷണ റിപ്പോര്‍ട്ട് സമര്‍പ്പിച്ചില്ല. ആരോപണമുയര്‍ന്ന്​ മാസങ്ങള്‍ കഴിഞ്ഞിട്ടും റിപ്പോര്‍ട്ട് കൈമാറാന്‍ ഉന്നത ഉദ്യോഗസ്ഥര്‍ക്ക്​ കഴിഞ്ഞിട്ടില്ല. സാങ്കേതിക നടപടിക്രമങ്ങള്‍ പൂര്‍ത്തിയാക്കുന്നതിന്റെ ഭാഗമായാണ് റിപ്പോര്‍ട്ട് നീളുന്നതെന്നാണ്​ വിവരം.

അന്വേഷിച്ച്​ റിപ്പോര്‍ട്ട് നല്‍കാന്‍ ധന​ സെക്രട്ടറി അടക്കമുള്ളവരെ ചുമതലപ്പെടുത്തിയതായി സര്‍ക്കാര്‍ പറഞ്ഞിരുന്നു. മുഖ്യമന്ത്രിയുടെ മകളുടെ കമ്പനിക്കെതിരെ ഉയര്‍ന്ന പരാതിയിലെ ഐ.ജി.എസ്.ടി അന്വേഷണ റിപ്പോര്‍ട്ട് ലഭിച്ചാല്‍ ജനങ്ങളെ അറിയിക്കുമെന്ന്​ ധനമന്ത്രി കെ.എന്‍. ബാലഗോപാല്‍ വ്യക്തമാക്കിയിരുന്നു. എന്നാൽ ഇതുവരെ റിപ്പോർട്ട് സമർപ്പിച്ചിട്ടില്ല.

എക്‌സാലോജിക് കമ്പനിക്ക് സി.എം.ആർ.എല്ലില്‍നിന്നു ലഭിച്ച 1.72 കോടിയുടെ ഐ.ജി.എസ്.ടി അടച്ചില്ലെന്നാണ്​ മാത്യു കുഴല്‍നാടന്‍ എം.എൽ.എ ആരോപിച്ചത്​. ഒരുമാസം മുമ്പ്​ ഇദ്ദേഹം ഇതു സംബന്ധിച്ച പരാതിയും നല്‍കി. 45 ലക്ഷം രൂപയുടെ നികുതി അടച്ചിട്ടുണ്ടെന്നാണ് ചില രേഖകള്‍ വ്യക്തമാക്കുന്നത്. ബാക്കി തുകയുടെ ഐ.ജി.എസ്.ടി അടച്ചിട്ടുണ്ടോ എന്നാണ് അന്വേഷണത്തില്‍ വ്യക്തമാക്കേണ്ടത്.