ക്ഷേത്രത്തിൽ വിപ്ലവഗാനം: ക്ഷേത്രോപദേശക സമിതിയുടെ പ്രവർത്തനം നിർത്തി വെപ്പിച്ചതായി ദേവസ്വം ഹൈകോടതിയിൽ

കൊച്ചി: കൊല്ലം കടക്കലിൽ ക്ഷേത്രോത്സവ പരിപാടിയിൽ വിപ്ലവഗാനം പാടിയ സംഭവത്തിൽ സംഘാടകരായ ക്ഷേത്രോപദേശക സമിതിയുടെ പ്രവർത്തനം നിർത്തി വെപ്പിച്ചതായി ദേവസ്വം ബോർഡ്​ ഹൈകോടതിയിൽ. പരിപാടി നടത്തിപ്പ്​ സംബന്ധിച്ച്​ സത്യവാങ്മൂലം സമർപ്പിക്കാൻ നിർദേശിച്ച ജസ്റ്റിസ് അനിൽ. കെ. നരേന്ദ്രൻ, ജസ്റ്റിസ് എസ്. മുരളി കൃഷ്ണ എന്നിവരടങ്ങുന്ന ഡിവിഷൻബെഞ്ച്​ ഹരജി വേനലവധിക്ക്​ ശേഷം വീണ്ടും പരിഗണിക്കാൻ മാറ്റി.

ക്ഷേത്രോത്സവത്തോടനുബന്ധിച്ച് വിപ്ലവഗാനം പാടിയതിനെതിരെ യൂത്ത് കോൺഗ്രസ് സംസ്ഥാന വൈസ് പ്രസിഡന്റ് കൂടിയായ അഡ്വ. വിഷ്ണു സുനിൽ പന്തളം നൽകിയ ഹരജിയാണ്​ കോടതിയുടെ പരിഗണനയിലുള്ളത്​.

ക്ഷേത്രോപദേശക സമിതി പ്രസിഡന്‍റ്​, കടക്കൽ പൊലീസ്​ സ്റ്റേഷൻ ഹൗസ്​ ഓഫിസർ എന്നിവ​രെ​ കോടതി സ്വ​മേധയ കക്ഷി ചേർത്തിരുന്നു. സംഘാടകർ പ്രോഗ്രാം നോട്ടീസ് നേരത്തെ കണ്ടിരുന്നില്ലേയെന്ന്​ വ്യാഴാഴ്ച ഹരജി പരിഗണിക്കുന്നതിനിടെ കോടതി ആരാഞ്ഞു. പരിപാടികൾ സംഘടിപ്പിക്കുന്നവർക്കാണ്​ അതിന്റെ ഉത്തരവാദിത്തമെന്നും കോടതി വ്യക്​തമാക്കി.