റോഡപകടം കൂടി; മരണം കുറഞ്ഞു

തിരുവനന്തപുരം: സംസ്ഥാനത്ത്​ കഴിഞ്ഞ വർഷം റോഡപകടങ്ങൾ കൂടിയെങ്കിലും മരിച്ചവരുടെ എണ്ണത്തിൽ കുറവ്. എ.ഐ കാമറകൾ, എൻ​ഫോഴ്​സ്​മെന്‍റ്​ പ്രവർത്തനം വിപുലമാക്കൽ, ബോധവത്​കരണം തുടങ്ങിയ ഘടകങ്ങളാണ്​ മരണം​ കുറയാൻ കാരണമായതെന്നാണ്​ മോട്ടോർ വാഹന വകുപ്പ്​ വിലയിരുത്തൽ. യാത്രക്കാരിൽ ഭൂരിപക്ഷവും ഹെൽമറ്റ്​, സീറ്റ് ബെൽറ്റ്​ എന്നിവ ശീലമാക്കിയതും മരണ നിരക്ക്​ കുറച്ചുവെന്നും അധികൃതർ അവകാശപ്പെടുന്നു.

‘സുരക്ഷാപ്രവർത്തനം ഊർജിതമാക്കും’

ഇക്കൊല്ലവും റോഡ്​ സുരക്ഷാ പ്രവർത്തനം ഊർജിതമാക്കാനുള്ള ശ്രമത്തിലാണ്​ മോട്ടോർ വാഹന വകുപ്പ്​. വർധിക്കുന്ന വാഹനാപകടങ്ങൾ കുറക്കാൻ​ മോട്ടോർ വാഹന വകുപ്പ്​-പൊലീസ് യോഗം ഡിസംബറിൽ ചേർന്നിരുന്നു. എ.ഡി.ജി.പിയും ഗതാഗത കമീഷണറും ജില്ല പൊലീസ് മേധാവിമാരുമായും ആർ.ടി.ഒ മാരുമായും ചർച്ചയും നടത്തി. ഇതനുസരിച്ച പരിശോധന നടന്നുവരുകയാണെന്ന്​ മോ​ട്ടോർ വാഹന വകുപ്പ്​ അറിയിച്ചു. ഡ്രൈവർമാരെ കൂടുതൽ സുരക്ഷാബോധമുള്ളവരാക്കി അപകടങ്ങളില്ലാതാക്കാനുള്ള ബോധവത്​കരണ പരിപാടി വ്യാപകമായി സംഘടിപ്പിക്കും.

• റോഡുകൾ കൂടുതൽ സുരക്ഷിതമാക്കാൻ പകലും രാത്രിയും സംയുക്ത പരിശോധന നടത്തും.
• അപകട മേഖലകളിൽ​ കൂടുതൽ പരിശോധന​.
• അമിതവേഗം, മദ്യപിച്ച് വാഹനമോടിക്കൽ, അശ്രദ്ധമായി വാഹനമോടിക്കൽ, ഹെൽമറ്റും സീറ്റ് ബെൽറ്റും ധരിക്കാതിരിക്കൽ, അമിത ഭാരം കയറ്റി സർവിസ് നടത്തൽ എന്നിവക്കെതിരെ നടപടിക്ക്​ നിർദേശം നൽകി.