ശബരിമലയിലെ അക്രമ സംഭവങ്ങളിൽ നിശബ്ദത പാലിക്കുന്നു; നിരീക്ഷണ സമിതിക്കെതിരെ സർക്കാർ

കൊച്ചി: ‘മനിതി’ സംഘത്തിന് നിലക്കലിൽനിന്ന് പമ്പയിലേക്ക് പോകാൻ സ്വകാര്യവാഹനം അനുവദിച്ചില്ലായിരുന്നെങ്കിൽ ക്രമസമാധാന പ്രശ്​നങ്ങളുണ്ടാകുമായിരുന്നെന്ന്​ സർക്കാർ ഹൈകോടതിയിൽ. അവരുടെ സുരക്ഷയെ കരുതിയാണ്​ സ്വകാര്യ വാഹനം അനുവദിച്ചത്​. ശബരിമലയിൽ ചിലർക്ക്​ വ്യക്​തിപരമായി പൊലീസ്​ സംരക്ഷണം നൽകേണ്ടതില്ലെന്ന നിരീക്ഷണ സമിതിയുടെ നിർദേശം നിയമപരമല്ലെന്നും യുവതികൾ സംരക്ഷണം തേടിയാൽ നൽകാൻ ബാധ്യതയുണ്ടെന്നിരിക്കെ സമിതി നിർദേശം പാലിക്ക​ുന്നത്​ സുപ്രീം കോടതി വിധിക്ക്​ എതിരാകുമെന്നും പത്തനംതിട്ട എസ്.പി ടി. നാരായണൻ സമർപ്പിച്ച സത്യവാങ്​മൂലത്തിൽ പറയുന്നു. ശബരിമല നിരീക്ഷണസമിതി നൽകിയ റിപ്പോർട്ടിന്​ മറുപടിയായാണ്​ സത്യവാങ്​മൂലം സമർപ്പിച്ചത്​.

‘മനിതി’ സംഘത്തിന് സ്വകാര്യവാഹനം അനുവദിച്ചത് നിലക്കൽ - പമ്പ റൂട്ടിൽ സ്വകാര്യവാഹനം അനുവദിക്കരുതെന്ന ഹൈകോടതി ഉത്തരവി​​​െൻറ ലംഘനമാണെന്നായിരുന്നു നിരീക്ഷണ സമിതിയുടെ റിപ്പോർട്ട്. കേരളത്തിലെത്തിയ ‘മനിതി’ സംഘത്തി​​​െൻറ വാഹനത്തിന് അതിർത്തി മുതൽ മത, വർഗീയ വാദികളുടെയും ശബരിമലയിലെ യുവതി പ്രവേശനത്തെ എതിർക്കുന്നവരുടെയും ആക്രമണങ്ങൾ നേരിടേണ്ടി വന്നതായി സത്യവാങ്​മൂലത്തിൽ പറയുന്നു. സംഘം നിലക്കലിൽ ഇറങ്ങി കെ.എസ്.ആർ.ടി.സി ബസിൽ പമ്പക്ക്​ പോയാൽ ക്രമസമാധാന പ്രശ്നമുണ്ടാകുമെന്ന് ഇൻറലിജൻ​സ്​ റിപ്പോർട്ടുമുണ്ടായിരുന്നു. ഇക്കാര്യങ്ങളെല്ലാം പരിഗണിച്ചാണ്​ നിലക്കലിലെ സ്പെഷൽ ഒാഫിസർ സ്വകാര്യ വാഹനം പമ്പയിലേക്ക്​ അനുവദിച്ചത്. ഉന്നത പൊലീസ് ഉദ്യോഗസ്ഥരുമായി ആലോചിച്ച് സർക്കാറി​​​െൻറ അനുമതിയോടെയായിരുന്നു തീരുമാനം. ഹൈകോടതിയെ അപമാനിക്കാനും ഉത്തരവ് ലംഘിക്കാനും ഉദ്ദേ​ശിച്ചിട്ടില്ല.

സുപ്രീം കോടതി വിധിയനുസരിച്ച് ദർശനത്തിനെത്തുന്ന യുവതികൾ സംരക്ഷണം തേടിയാൽ സുരക്ഷ ഉറപ്പാക്കാൻ പൊലീസിന്​ ബാധ്യതയുണ്ട്​. വ്യക്​തിപരമായ സംരക്ഷണം പാടില്ലെന്ന ശിപാർശ അതിനാൽ അംഗീകരിക്കാനാവില്ല. സാധാരണ ഭക്തരുടെ സുരക്ഷയെ പ്രതികൂലമായി ബാധിക്കുമെന്ന വാദം നിലനിൽക്കില്ല. ഇത്തരം കാര്യങ്ങളിൽ പൊലീസിന് പ്രവർത്തന സ്വാതന്ത്ര്യം ഉണ്ടാകണം. യുവതികൾക്ക് സംരക്ഷണം നൽകേണ്ടതില്ലെന്ന തരത്തിലെ ശിപാർശ നിരീക്ഷണ സമിതിക്ക് മുന്നോട്ടുവെക്കാനാവില്ല. ബിന്ദുവിനെയും കനകലത​െയയും കൂടാതെ ജനുവരി നാലിന്​ മറ്റൊരു യുവതിയും പതിനെട്ടാംപടി ചവിട്ടി ദർശനം നടത്തി മടങ്ങിയിട്ടുണ്ട്​. യഥാർഥ ഭക്​തരാരും ഇവരെ തടഞ്ഞില്ല. ഭക്തരെന്ന വ്യാജേന എത്തിയിരുന്ന പ്രതിഷേധക്കാരാണ്​ നേര​േത്ത പ്രശ്​നങ്ങളുണ്ടാക്കിയതെന്നതിന്​ തെളിവാണിത്​.

ഇത്തരക്കാർ നടത്തിയ നിയമവിരുദ്ധ പ്രവർത്തനങ്ങളെക്കുറിച്ചും അക്രമങ്ങളെക്കുറിച്ചും നിരീക്ഷണ സമിതിയുടെ റിപ്പോർട്ട് മൗനം പാലിക്കുന്നതായും സത്യവാങ്​മൂലത്തിൽ പറയുന്നു. ഇത്തരം സംഭവങ്ങളെക്കുറിച്ചുകൂടി പരിശോധിച്ച്​ റിപ്പോർട്ട്​ നൽകാൻ നിർദേശിക്കണമെന്നും പ്രതിഷേധങ്ങള്‍ പാടില്ലെന്ന ഹൈകോടതിവിധി ലംഘിച്ച ഇത്തരം അക്രമികൾക്കെതിരെ കോടതിയലക്ഷ്യ നടപടി സ്വീകരിക്കണമെന്നും സത്യവാങ്​മൂലത്തിൽ ആവശ്യപ്പെടുന്നു.