സന്നിധാനത്ത്​ ആശ്വാസം; ദുരിതകേന്ദ്രമായി പമ്പയും ഇടത്താവളങ്ങളും

പത്തനംതിട്ട: നിയന്ത്രണങ്ങൾ കടുപ്പിച്ചതോടെ​ ശബരിമല സന്നിധാനത്ത്​ തിരക്ക്​ കുറഞ്ഞപ്പോൾ പമ്പയിൽ തടഞ്ഞുവെച്ച തീർഥാടകർക്ക്​ കടുത്ത ദുരിതം. ചുട്ടുപൊള്ളുന്ന വെയിലിൽ സൂചികുത്താൻ പോലും ഇടമില്ലാത്ത സ്ഥലത്ത്​ മണിക്കൂറുകൾ കാത്തുനിന്ന്​ കുട്ടികളും വൃദ്ധരും അടക്കമുള്ള അയ്യപ്പഭക്തർ​. പ്രധാന ഇടത്താവളമായ നിലക്കലും സമാന അവസ്ഥയാണ്​. ഏതാനും ദിവസമായി നിലക്കലിൽ പൊലീസ് ഏർപ്പെടുത്തിയിരുന്ന നിയന്ത്രണങ്ങൾ പിൻവലിച്ചതോടെയാണ്​ ബുധനാഴ്ച പുലർച്ച മുതൽ പമ്പയിൽ വൻ തിരക്ക്​​ അനുഭവപ്പെട്ടത്.

പമ്പാ മണപ്പുറവും ത്രിവേണി തീരവും തീർഥാടകരാൽ തിങ്ങിനിറഞ്ഞു. ഇതോടെ പിഞ്ചുകുട്ടികൾ അടങ്ങുന്ന പതിനായിരക്കണക്കിന് തീർഥാടകരാണ് മല ചവിട്ടുന്നതിനായുള്ള ഊഴംകാത്ത് പൊരിയുന്ന വെയിലിൽ മണിക്കൂറുകൾ കാത്തുനിന്നത്. തീർഥാടകർക്ക് മഴയും വെയിലും ഏൽക്കാതെ ക്യൂ നിൽക്കാൻ പാകത്തിൽ പമ്പാ തീരത്ത് നാമമാത്രമായ നടപ്പന്തലുകൾ മാത്രമാണുള്ളത്​. പമ്പാ തീരത്ത് വിശാലമായ നടപ്പന്തൽ അടക്കമുള്ള നിർമാണ പ്രവർത്തനങ്ങൾക്ക് തീർഥാടന ടൂറിസം പദ്ധതിയിൽ മൂന്നു​വർഷം മുമ്പ് പണം അനുവദിച്ചിരുന്നതാണ്​. എന്നാൽ, ഇനിയും അത്​ പൂർത്തിയാകാത്തതാണ്​ തീർഥാടകരുടെ ദുരിതം വർധിപ്പിക്കുന്നത്​.

തീർഥാടകരുടെ തുടർച്ചയായ പ്രതിഷേധം മൂലമാണ്​ നിലക്കലിലെ നിയന്ത്രണങ്ങളിൽ ചെറിയ ഇളവ്​ നൽകിയത്​. ഇതോടെ ദുരിത കേന്ദ്രമായി പമ്പാ മാറുകയായിരുന്നു. തീർഥാടകരെ തടഞ്ഞുവെക്കുന്ന സ്ഥലങ്ങളിലെല്ലാം കുടിവെള്ളം അടക്കം അടിസ്ഥാന സൗകര്യങ്ങൾ ലഭ്യമാകേണ്ടതാണ്​. എന്നാൽ, ഇതൊന്നും കണക്കിലെടുക്കാതെയാണ്​ പൊലീസിന്‍റെ നടപടി. തടയൽ അല്ലാതെ മറ്റ്​ മാർഗങ്ങളൊന്നും തങ്ങൾക്ക്​ മുന്നിൽ ഇല്ലെന്ന്​ പൊലീസ്​ പറയുമ്പോൾ, തടഞ്ഞുനിർത്തുന്നവരുടെ ദുരിതം പരിഹരിക്കാൻ ദേവസ്വം ബോർഡിന്‍റെ ഭാഗത്തുനിന്ന് കാര്യമായ നടപടികളൊന്നും ഉണ്ടാകുന്നുമില്ല.