സന്നിധാനത്ത്​ വനിത പൊലീസിനെ വിന്യസിക്കില്ല

തിരുവനന്തപുരം: ശബരിമല സന്നിധാനത്തും പരിസരത്തും തൽക്കാലം വനിത പൊലീസി​െന വിന്യസിക്കേണ്ടതില്ലെന്ന്​ ധാരണ. പമ്പയിലും നിലക്കലിലും കൂടുതൽ വനിത പൊലീസിനെ വിന്യസിക്കാനും ഉന്നതതല പൊലീസ്​ യോഗത്തിൽ ധാരണയായി. തുലാമാസ പൂജക്ക്​ കൂടുതൽ സ്​ത്രീകൾ എത്തില്ലെന്നാണ്​ അധികൃതരുടെ കണക്കുകൂട്ടൽ. കൂടുതൽ സ്​ത്രീകൾ എത്തിയാൽ മാത്രമേ വനിത പൊലീസിനെ സന്നിധാനത്ത്​ വിന്യസിക്കുന്നത്​ പരിഗണിക്കൂ. ഇതുസംബന്ധിച്ച്​ തിങ്കളാഴ്​ച നടക്കുന്ന പൊലീസ്​, ദേവസ്വം, ബോർഡ്​ യോഗങ്ങളിൽ അന്തിമതീരുമാനമെടുക്കും.

ഡ്യൂട്ടിക്ക്​ നിയോഗിക്കുന്നതിനായി 40 വനിതാ പൊലീസുകാരുടെ പട്ടിക പത്തനംതിട്ട ജില്ലാ പൊലീസ്​ മേധാവി തയാറാക്കിയിരുന്നു. ഇതിൽ 30 പേരെ സന്നിധാനത്താണ് ഡ്യൂട്ടിക്ക് നിയോഗിച്ചത്. എന്നാൽ വിഷയത്തിൽ വിവാദം തുടരുന്ന സാഹചര്യത്തിൽ വനിതാ പൊലീസിനെ പമ്പയിൽ മാത്രം നിയോഗിക്കാനാണ് പുതിയ തീരുമാനം. വനിത പൊലീസിനെ നിയോഗിക്കണമെന്ന്​ ദേവസ്വം ബോർഡ്​ ഡി.ജി.പിയോട്​​ ആവശ്യപ്പെട്ടിരുന്നു.

തുലാമാസ പൂജക്ക്​ പുറമെ നവംബർ 17ന്​ തുടങ്ങുന്ന മണ്ഡല-മകരവിളക്ക്​ കാലത്തും നിയോഗിക്കുന്നതിനായി ദേവസ്വം ബോർഡ്​ വനിത ജീവനക്കാരുടെ പട്ടികയും തയാറാക്കിയിട്ടുണ്ട്​. എംപ്ലോയ്​മ​​​​​െൻറ്​ എക്​സ്​ചേഞ്ച്​ വഴി വനിത ജീവനക്കാരെ താൽകാലികമായി നിയമിക്കുന്നതിനും നടപടിയായിട്ടുണ്ട്. ഇൗ രണ്ടു പട്ടികകളിൽനിന്ന്​ വനിത ജീവനക്കാരെ നിയമിക്കണമെന്നാണ് ദേവസ്വം​ കമീഷണറുടെ ഉത്തരവിൽ പറയുന്നത്​. അതേസമയം, സന്നിധാനത്ത്​ ജോലി ചെയ്യുന്നതിന്​ ദേവസ്വം ബോർഡിലെ വനിത ജീവനക്കാർ കൂട്ട​േത്താടെ വിസമ്മതിക്കുന്നതായി സൂചനയുണ്ട്​.