മുഖ്യമന്ത്രിയാ​കേണ്ടി വന്നാൽ കാറും പെട്രോളും ഡ്രൈവറും സ്വന്തം ചെലവിലായിരിക്കുമെന്ന്​ സാബു എം. ജേക്കബ്

കൊച്ചി: ഏതെങ്കിലും സാഹചര്യത്തിൽ കേരള മുഖ്യമന്ത്രിയാകേണ്ടി വന്നാല്‍ സ്വന്തം ചെലവിലായിരിക്കും കാറും പെട്രോളും ഡ്രൈവറുമെന്ന്​ ട്വന്‍റി 20 പാര്‍ട്ടിയുടെ ചീഫ് കോഡിനേറ്റർ സാബു എം. ജേക്കബ്. കേരളത്തില്‍ മാറ്റത്തിനുവേണ്ടി ജനങ്ങള്‍ ആഗ്രഹിക്കുന്നുണ്ട്​. അദ്ദേഹം പറഞ്ഞു. ഇഗ്ലീഷ്​ പത്രത്തിനു നല്‍കിയ അഭിമുഖത്തിലാണ് സാബു എം. ജേക്കബ് അഭിപ്രായം പങ്കു​വെച്ചത്​.

തെലങ്കാനയിൽ നിന്നുള്ളൊരു എം.പിയാണ് കെജ്‌രിവാളുമായി അടുക്കണമെന്ന് നിർദ്ദേശിച്ചത്. ഒരു പൊതുസുഹൃത്ത് വഴി കെജ്‍രിവാളുമായി കൂടിക്കാഴ്ച ശരിയായി. ഡൽഹിയിൽ അദ്ദേഹം രാജകീയ സ്വീകരണം നൽകുകയും കേരളത്തിൽ മുഖ്യമന്ത്രി സ്ഥാനാർത്ഥിയാകണമെന്ന് നിർദേശിച്ചിരിക്കയാണെന്ന്​ സാബു എം. ജേക്കബ് പറഞ്ഞു. എന്നാല്‍ മുഖ്യമന്ത്രി സ്ഥാനം ഏറ്റെടുക്കാന്‍ താല്‍പര്യമില്ലെന്ന് പറഞ്ഞതായും അദ്ദേഹം കുട്ടിച്ചേര്‍ത്തു.

``എനിക്ക് സംസ്ഥാനത്തിന്‍റെ മുഖ്യമന്ത്രിയാകാൻ താൽപ്പര്യമില്ല. ഇനി ഏതെങ്കിലും പ്രത്യേക സാഹചര്യങ്ങളാല്‍ മുഖ്യമന്ത്രിയായാൽ എന്‍റെ സ്വകാര്യ കാർ ഉപയോഗിക്കും. ഞാൻ വാങ്ങിയ പെട്രോളിൽ ആയിരിക്കും കാർ ഓടിക്കുക, അതെന്‍റെ ഡ്രൈവർ ഓടിക്കും. എന്‍റെ സ്വന്തം ചെലവിൽ ഞാൻ കുടുംബത്തോടൊപ്പം വിദേശത്തേക്ക് പോകും, ​​ സർക്കാർ ചെലവിലായിരിക്കില്ല'', സാബു ജേക്കബ് പറഞ്ഞു. ഏതാനും ആഴ്ചകള്‍ നീണ്ട പ്രചരണം കൊണ്ട് ട്വന്‍റി 20 പാര്‍ട്ടി പ്രവര്‍ത്തകരുടെ എണ്ണം കോണ്‍ഗ്രസിനെ മറികടക്കാൻ കഴിയുമെന്ന പ്രതീക്ഷയും അദ്ദേഹം പങ്കുവെച്ചു. തൃക്കാക്കര ഉപതെരഞ്ഞെടുപ്പ്​ പ്രചാരണവേള മുതൽ ആം ആദ്മി പാര്‍ട്ടിയുമായി സഹകരിച്ചാണ്​, ട്വന്‍റി 20യുടെ പ്രവര്‍ത്തനം നടക്കുന്നത്​. ഇത്​, സംസ്ഥാന തലത്തില്‍ വ്യാപിപ്പിക്കാനാണ്​ നീക്കം.