രാജിയിൽ വിഷമമുണ്ട്​, സുധീരനുമായി ചർച്ച നടത്തും -വി.ഡി. സതീശൻ

തിരുവനന്തപുരം: കെ.പി.സി.സി മുൻ പ്രസിഡന്‍റ്​ വി.എം. സുധീരൻ പാർട്ടി രാഷ്​ട്രീയകാര്യ സമിതിയിൽനിന്ന്​ രാജിവെച്ചത്​ വിഷമമുണ്ടാക്കുന്ന കാര്യമാണെന്ന്​ പ്രതിപക്ഷ നേതാവ്​ വി.ഡി. സതീശൻ. അനാവശ്യ സമ്മർദ്ദമുണ്ടാക്കുന്നയാളല്ല അദ്ദേഹം.

സുധീരനുമായി ചർച്ച നടത്തും. സമിതിയിൽനിന്ന്​ മാറിനിൽക്കുന്നത്​ ഒരിക്കലും ഉൾക്കൊള്ളാൻ കഴിയില്ലെന്നും സതീശൻ പറഞ്ഞു. രാജിക്ക്​ പിന്നിൽ പുനഃസംഘടനുമായി ബന്ധപ്പെട്ട അതൃപ്​തിയുണ്ടോ എന്ന മാധ്യമപ്രവർത്തകരുടെ ചോദ്യത്തിന്​ തനിക്ക്​ അറിയില്ലെന്നായിരുന്നു സതീശന്‍റെ മറുപടി.

സുധീരന്‍റെ രാജി നിർഭാഗ്യകരമാണെന്ന്​ പി.ടി. തോമസ്​ എം.എൽ.എ പറഞ്ഞു. കെ.പി.സി.സി പ്രസിഡന്‍റ്​ കെ. സുധാകരനും വി.ഡി. സതീശനും സുധീരനുമായി ചർച്ച നടത്തും. അദ്ദേഹം ഉന്നയിച്ച കാര്യങ്ങൾ ഗൗരവത്തോടെ കാണണമെന്നും പി.ടി. തോമസ്​ പറഞ്ഞു. അതേസമയം, വിഷയത്തിൽ പ്രതികരിക്കാനില്ലെന്ന്​ എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ പറഞ്ഞു.

ശനിയാഴ്ചയാണ് കെ.പി.സി.സി​ പ്രസിഡന്‍റ്​ കെ. സുധാകരന്​ സുധീരൻ രാജി​ക്കത്ത്​ കൈമാറിയത്​. ശാരീരിക അസ്വസ്ഥതകളുണ്ടെന്ന്​ ​സുധാകരനെ ഫോണിൽ അറിയിച്ചുവെന്നാണ്​ റിപ്പോർട്ട്​.

കോൺഗ്രസിന്‍റ സാധാരണ പ്രവർത്തകനായി തുടരുമെന്ന്​ വി.എം. സുധീരൻ അറിയിച്ചിട്ടുണ്ട്​. എന്നാൽ, പുനഃസംഘടനയുമായി ബന്ധപ്പെട്ട്​ സുധീരന്​ അതൃപ്​തിയുണ്ടെന്നാണ്​ സൂചന. മുതിർന്ന നേതാക്കളുടെ അഭിപ്രായം പാർട്ടി പരിഗണിക്കുന്നില്ലെന്ന പരാതി സുധീരനുണ്ടായിരുന്നു.