ഹക്കീം ഫൈസിക്കു പിന്നിൽ ജമാഅത്തെ ഇസ്​ലാമി -സമസ്ത നേതാക്കൾ

കോഴിക്കോട്​: സി.ഐ.സി ജന. സെക്രട്ടറി അബ്​ദുൽ ഹക്കീം ഫൈസി ആദൃശ്ശേരിക്ക്​ പിന്നിൽ ജമാഅത്തെ ഇസ്​ലാമിയാണെന്ന്​ സമസ്ത മുശാവറ അംഗങ്ങളായ വാക്കോട് മൊയ്തീൻ കുട്ടി ഫൈസി, കെ. ഹൈദർ ഫൈസി പനങ്ങാങ്ങര, അസ്ഗറലി ഫൈസി പട്ടിക്കാട്, പി.എം. അബ്ദുസലാം ബാഖവി വടക്കേക്കാട് എന്നിവർ വാർത്തസമ്മേളനത്തിൽ ആരോപിച്ചു.

പ്രവാചകന്‍റെ കാലത്ത്​ രാഷ്ട്ര ഭരണ കാര്യങ്ങൾക്കാണ്​ മുൻഗണന നൽകപ്പെട്ടതെന്ന അദ്ദേഹത്തിന്‍റെ വാദം ജമാഅത്തിന്‍റെ മത രാഷ്ട്ര വാദത്തിന്‍റെ ഒളിച്ചുകടത്തലാണ്​. സി.ഐ.സി സെനറ്റിലും സിൻഡികേറ്റിലും വനിതകൾക്ക്​ പ്രാതിനിധ്യമാകാമെന്ന വാദവും സമസ്തക്ക്​ അംഗീകരിക്കാനാവില്ല.

അദ്ദേഹത്തിന്‍റെ ഇത്തരം നിലപാടുകൾകൊണ്ടും മധ്യസ്ഥരുടെ ഒമ്പത്​ ഇന നിർദേശങ്ങൾ അംഗീകരിക്കാത്തതുകൊണ്ടുമാണ്​ സി.ഐ.സിയുമായുള്ള ബന്ധം പൂർണമായും സമസ്ത വിഛേദിച്ചത്​. മുസ്​ലിം ലീഗിൽ വഹാബികൾ ഉള്ളതുപോലെ സി.ഐ.സിയെയും അവർ ഉൾക്കൊള്ളുന്നുണ്ടെങ്കിൽ സമസ്തക്ക്​ ഒന്നും ചെയ്യാനില്ല. എന്നാൽ, സമസ്തയുമായി ഇതുവരെ നിലനിന്ന സൗഹൃദത്തിന്​ വീഴ്ച വരുത്താതെ സൂക്ഷിക്കുന്നത്​ നല്ലതാണെന്നും നേതാക്കൾ വ്യക്തമാക്കി.

കഴിഞ്ഞദിവസം ഹക്കീം ഫൈസി സമസ്തക്കെതിരിൽ പറഞ്ഞ കാര്യങ്ങൾ അടിസ്ഥാന രഹിതമാണ്​. പരാതിയുമായി ബന്ധപ്പെട്ട് സമസ്ത മുശാവറ ചുമതലപ്പെടുത്തിയ സമിതി അദ്ദേഹവുമായി ചർച്ച നടത്തിയിരുന്നു. യഥാർഥ വിഷയത്തിൽനിന്ന്​ ഒഴിഞ്ഞുമാറിയ മറുപടികളാണ് അദ്ദേഹം നൽകിയത്. വീണ്ടും ചർച്ചക്ക്​ ഒരുങ്ങവെ, ഹക്കീം ഫൈസി ജന. സെക്രട്ടറിയായി ഏകപക്ഷീയമായി പ്രഖ്യാപിക്കപ്പെട്ടതിലൂടെ പ്രശ്നപരിഹാരത്തിനുള്ള എല്ലാ വാതിലുകളും കൊട്ടിയടക്കുകയായിരുന്നുവെന്നും മുശാവറ അംഗങ്ങൾ പറഞ്ഞു.

മുശാവറ യോഗത്തിൽനിന്ന്​ ജിഫ്​രി തങ്ങൾ ഇറങ്ങിപ്പോയത്​ നിഷേധിച്ച്​ വാർത്തകുറിപ്പ്​ ഇറക്കിയതിൽ ത​നിക്ക്​ സ്വന്തമായി റോളില്ലെന്നും എല്ലാം ഉസ്താദുമാരുടെ അറിവോടെയാണെന്നും സമസ്ത ഓഫിസ്​ മാനേജർ മോയിൻകുട്ടി മാസ്റ്റർ ചോദ്യത്തിന്​ മറുപടിയായി പറഞ്ഞു.