കുളം കലക്കാൻ സംഘ്​പരിവാർ; കുഴപ്പത്തിലായി എൻ.എസ്​.എസ്​

കോട്ടയം: സ്പീക്കർ എ.എൻ. ഷംസീറിന്‍റെ മിത്ത്​ പ്രസംഗത്തിൽ സ്വീകരിച്ച പരസ്യനിലപാടിൽ കുഴപ്പത്തിലായി എൻ.എസ്​.എസ്​. രണ്ടുദിവസമായി വിഷയത്തിൽ എൻ.എസ്​.എസ്​ ആസ്ഥാനത്തുനിന്ന്​ പ്രതികരണങ്ങളുണ്ടായിരുന്നെങ്കിലും വ്യാഴാഴ്ച അത്തരത്തിലൊന്നുമുണ്ടായില്ല. അതിനിടെ, സംഘ്​പരിവാർ നേതാക്കൾ ചങ്ങനാശ്ശേരിയിലെ ആസ്ഥാനത്തെത്തി ‘കുളം കലക്കി മീൻ പിടിക്കാൻ’ നീക്കം ആരംഭിച്ചതും എൻ.എസ്​.എസിന്‍റെ നീക്കത്തിന്​ തിരിച്ചടിയാകുകയാണ്​.

വിചാരിച്ചതിനും അപ്പുറത്തേക്ക്​ കാര്യങ്ങൾ പോകുന്നത്​ എൻ.എസ്​.എസ്​ നേതൃത്വത്തിലും ആശയക്കുഴപ്പമുണ്ടാക്കിയിട്ടുണ്ട്​. ഇത്രയുംനാൾ രാഷ്ട്രീയ പ്രസ്ഥാനങ്ങളോട്​ എൻ.എസ്​.എസ്​ സമദൂര നിലപാടിലായിരുന്നു​. എന്നാൽ, വിശ്വാസ സംരക്ഷണത്തിന്​ ഹിന്ദുസംഘടനകൾക്കൊപ്പം നിലകൊള്ളുമെന്ന ജനറൽ സെക്രട്ടറിയുടെ പ്രസ്താവന രാഷ്ട്രീയനേട്ടത്തിന്​ ഉപയോഗിക്കാൻ സംഘ്​പരിവാർ മുന്നോട്ടുവന്നതും തലസ്ഥാനത്ത്​ പ്രതിഷേധത്തിന്‍റെ ഭാഗമായി നാമജപ യാത്രക്കിറങ്ങിയ സമുദായാംഗങ്ങൾക്കെതിരെ കേസെടുത്തതും സാമ്പത്തികാരോപണങ്ങൾ ഉന്നയിച്ച്​ സി.പി.എം നേതാക്കൾ രംഗത്തെത്തിയതും എൻ.എസ്​.എസിനെ പ്രതിരോധത്തിലാക്കുകയാണ്​. ഷംസീർ മാപ്പ്​ പറയണമെന്ന നിലപാടിൽനിന്ന്​ പിന്നാക്കമില്ലെന്ന്​ പ്രഖ്യാപിച്ചെങ്കിലും അത്തരത്തിലുള്ള ഒരു നടപടിയുമുണ്ടാകാത്തതും തിരിച്ചടിയാണ്​.

സുകുമാരൻ നായരുടെ പ്രസ്താവന തള്ളാനും കൊള്ളാനും കഴിയാതെ കോൺഗ്രസ്​ നേതൃത്വം ചില പ്രസ്താവനകൾ നടത്തിയെങ്കിലും ശബരിമല വിഷയത്തിലേതെന്നപോലെ ഈ വിഷയത്തിൽ പരസ്യ പ്രതിഷേധത്തിനില്ലെന്ന്​ ​വ്യക്തമാക്കിയതും എൻ.എസ്​.എസിനെ നിരാശരാക്കുന്നു. സംഘ്​പരിവാർ സംഘടനകൾ ഈ വിഷയത്തിൽ ചങ്ങാത്തത്തിന്​ എത്തിയത്​ സമദൂര നിലപാടിന്​ തിരിച്ചടിയാകുമെന്ന ആശങ്ക സമുദായത്തിനുള്ളിലുമുണ്ട്​​. സി.പി.എമ്മിലെ എ.കെ. ബാലനെപ്പോലുള്ളവർ നടത്തിയ പരസ്യ ആരോപണങ്ങളും തിരിച്ചടിയാണ്​.

ക്ഷേത്രഭൂമിയുൾപ്പെടെ എൻ.എസ്​.എസ്​ കൈവശം ​െവച്ചിരിക്കുകയാണെന്ന ആരോപണത്തിന് ആര്​ മറുപടി പറയാൻ എന്ന നിലയിൽ അതിനെ സുകുമാരൻ നായർ പരിഹസിച്ച്​ തള്ളിയെങ്കിലും മാസങ്ങൾക്കുമുമ്പ്​ എൻ.എസ്​.എസ്​ യോഗത്തിൽനിന്ന്​ ഇറങ്ങിപ്പോയ അംഗങ്ങളിൽ ചിലർ സമാനമായ ആക്ഷേപങ്ങൾ ഉയർത്തുകയും ചെയ്തിരുന്നു. ഈ വിഷയത്തിൽ സർക്കാറിന്‍റെ ഭാഗത്തുനിന്ന്​ മറ്റ്​ നീക്കങ്ങളെന്തെങ്കിലുമുണ്ടാകുമോയെന്ന ആശങ്കയും എൻ.എസ്​.എസ്​ കേന്ദ്രങ്ങൾക്കില്ലാതില്ല