എക്സൈസിനെ കണ്ട് കഞ്ചാവ് വിഴുങ്ങി; പ്രതി പിടിയിൽ

കോട്ടയം: പേരൂർ റോഡിൽ എക്സൈസ് സംഘത്തെ കണ്ട് ഭയന്ന യുവാവ് കഞ്ചാവ് വിഴുങ്ങി, തുടർന്ന് ആശുപത്രിയിൽ എത്തിച്ച് പുറത്തെടുത്തു. സംക്രാന്തി മമ്മൂട് സ്വദേശി ചിറ്റിലക്കാലായിൽ ലിജുമോൻ ജോസഫാണ് (35) സംഭവത്തിൽ പിടിയിലായത്.

ദേഹപരിശോധന ഭയന്ന് കടന്നുകളയാൻ ശ്രമിച്ച പ്രതിയെ എക്സൈസ് സംഘം സാഹസികമായി പിടികൂടിയതോടെ നിവൃത്തിയില്ലാതെ കൈവശം ഉണ്ടായിരുന്ന കഞ്ചാവുപൊതി ഇയാൾ വിഴുങ്ങുകയായിരുന്നു.

കഞ്ചാവുപൊതി തൊണ്ടയിൽ കുടുങ്ങി, ശ്വാസതടസ്സവും അസ്വസ്ഥതകളും കാണിച്ചതോടെ ഉടൻ മെഡിക്കൽ കോളജിൽ എത്തിച്ച് കഞ്ചാവ് പുറത്തെടുക്കുകയായിരുന്നു.