ആലപ്പുഴയിൽ സ്കൂൾ വിദ്യാർഥിനി കെ.എസ്.ആർ.ടി.സി ബസ് ഇടിച്ച് മരിച്ചു

മണ്ണഞ്ചേരി: ട്യൂഷൻ സെന്ററിലേക്ക് പോകാൻ റോഡ് മുറിച്ച് കടക്കവേ സ്കൂൾ വിദ്യാർഥിനി കെ.എസ്.ആർ.ടി.സി ബസ് ഇടിച്ച് മരിച്ചു. മണ്ണഞ്ചേരി പഞ്ചായത്ത്‌ 21ആം വാർഡ്‌ പനയ്ക്കൽ പള്ളിക്ക് സമീപം കോഴിപ്പറമ്പിൽ സിയാദിന്റെ മകൾ സഫ്ന സിയാദാണ് (15) മരിച്ചത്.ശനിയാഴ്ച രണ്ടേകാലോടെ ആലപ്പുഴ-തണ്ണീർമുക്കം റോഡിൽ കോമളപുരത്തായിരുന്നു അപകടം.

കലവൂർ ഗവണ്മെന്റ് ഹയർ സെക്കന്ററി സ്കൂളിലെ പത്താം ക്ലാസ് വിദ്യാർഥിനിയായിരുന്ന സഫ്ന സ്വകാര്യ ബസിറങ്ങി കോമളപുരത്തെ ട്യൂഷൻ ക്ലാസിലേക്ക് പോകാൻ റോഡ് മുറിച്ചു കടക്കുന്നതിനിടയിൽ ഈ ബസിനെ മറികടന്നു വന്ന കെ.എസ്.ആർ.ടി സി ബസ് ഇടിക്കുകയായിരുന്നു.തലയിലൂടെ ബസ് കയറിയിറങ്ങി. സംഭവ സ്ഥലത്ത് തന്നെ മരിച്ചു. ആലപ്പുഴ നോർത്ത് പൊലീസെത്തി മൃതദേഹം ആലപ്പുഴ വണ്ടാനം മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി. മാതാവ്: സഫീല. സഹോദരൻ: സഫീദ്. ഖബറടക്കം ഞായറാഴ്ച ഉച്ചക്ക് പടിഞ്ഞാറെ ജുമാമസ്ജിദ് ഖബർസ്ഥാനിൽ.