ഏറ്റുമുട്ടാനുറച്ച്​ ഗവർണർ​; ആറ്​ വാഴ്​സിറ്റികളിൽ വി.സി നിയമനത്തിന്​ സെർച്​ കമ്മിറ്റിയായി

തിരുവനന്തപുരം: സംസ്​ഥാനത്തെ ആറ്​ സർവകലാശാലകളിൽ വൈസ്​ചാൻസലർ നിയമനത്തിന്​ സ്വന്തം നിലക്ക്​ സെർച്​ കമ്മിറ്റി രൂപവത്​കരിച്ച്​ ഗവർണർ. കേരള, എം.ജി, ഫിഷറീസ്​ (കുഫോസ്​), സാ​​ങ്കേതിക സർവകലാശാല (കെ.ടി.യു), കാർഷികം, മലയാളം സർവകലാശാലകളുടെ വി.സി നിയമനത്തിനാണ്​ ചാൻസലറായ ഗവർണർ സെർച്​ കമ്മിറ്റി രൂപവത്​കരിച്ച്​ വെ​വ്വേറെ വിജ്​ഞാപനം ഇറക്കിയത്​. ആറ്​ സർവകലാശാലകളുടെയും പ്രതിനിധികൾ ഇല്ലാതെയാണ്​ സെർച്​ കമ്മിറ്റി രൂപവത്​കരിച്ചുള്ള ഗവർണറുടെ അപ്രതീക്ഷിത നീക്കം.

സർക്കാർ -ഗവർണർ ഏറ്റുമുട്ടലിനെ തുടർന്ന്​ വി.സി നിയമനത്തിൽ സർവകലാശാലകൾ സെർച്​ കമ്മിറ്റി പ്രതിനിധികളെ നൽകിയിരുന്നില്ല. കേരള സർവകലാശാല വി.സി നിയമനവുമായി ബന്ധപ്പെട്ട്​ സെർച്​ കമ്മിറ്റി പ്രതിനിധിയെ നൽകാൻ നിർദേശിച്ചുള്ള 2022ലെ ഹൈകോടതി ഉത്തരവ്​ ആയുധമാക്കിയാണ്​ ആറ്​ സർവകലാശാലകളിലേക്കും സെർച്​ കമ്മിറ്റി രൂപവത്​കരിച്ചത്​. കേരള സർവകലാശാലയിൽ കർണാടക സെൻട്രൽ യൂനിവേഴ്​സിറ്റി ​വൈസ്​ചാൻസലർ പ്രഫ. ഭട്ടു സത്യനാരായണ (യു.ജി.സി നോമിനി), ​ഐ.എസ്​.ആർ.ഒ ചെയർമാൻ ഡോ. എസ്​. സോമനാഥ്​ (ചാൻസലറുടെ നോമിനി) എന്നിവരാണ്​ സെർച്​ കമ്മിറ്റിയിലുള്ളത്​. കമ്മിറ്റി മൂന്ന്​ മാസം കൊണ്ട്​ വി.സി നിയമന ശിപാർശ നൽകണം.

ഫിഷറീസ്​ സർവകലാശാലയിൽ ജമ്മു യൂനിവേഴ്​സിറ്റി വൈസ്​ചാൻസലർ ഡോ. സഞ്​ജീവ്​ ജെയിൻ (യു.ജി.സി നോമിനി), കുസാറ്റ്​ മുൻ വി.സി ഡോ.പി.കെ അബ്​ദുൽ അസീസ്​ ( ചാൻസലറുടെ നോമിനി), ഡോ.ജെ.കെ ജെന (ഇന്ത്യൻ കൗൺസിൽ ഫോർ അഗ്രികൾച്ചറൽ റിസർച്ച്​ പ്രതിനിധി) എന്നിവരും മലയാളം സർവകലാശാലയിൽ ഡോ. ജാൻസി ജെയിംസ്​ (ചാൻസലറുടെ പ്രതിനിധി), പ്രഫ. ഭട്ടു സത്യനാരായണ (യു.ജി.സി പ്രതിനിധി) എന്നിവരും കാർഷിക സർവകലാശാലയിൽ ഡോ. സി.വി ജയമണി (ചാൻസലറുടെ പ്രതിനിധി), പ്രഫ. അലോക്​കുമാർ (യു.ജി.സി പ്രതിനിധി), ഡോ. ഹിമൻഷു പഥക്​ (ഇന്ത്യൻ കൗൺസിൽ ഫോർ അഗ്രികൾച്ചറൽ റിസർച്ച്​ പ്രതിനിധി) എന്നിവരും എം.ജി സർവകലാശാലയിൽ ഡോ.കെ.ആർ.എസ്​ സാംബശിവറാവു (യു.ജി.സി പ്രതിനിധി), ഡോ. അനന്തരാമകൃഷ്​ണൻ (ചാൻസലറുടെ പ്രതിനിധി), സാ​​ങ്കേതിക സർവകലാശാലയിൽ പ്രഫ.ക്ഷിതി ഭൂഷൺദാസ്​ (യു.ജി.സി പ്രതിനിധി), പ്രഫ. പി. രാജേന്ദ്രൻ (ചാൻസലറുടെ പ്രതിനിധി), ​ഡോ. എസ്​ ഉണ്ണികൃഷ്​ണൻ (എ.​ഐ.സി.ടി.ഇ പ്രതിനിധി) എന്നിവരും വി.സി നിയമനത്തിനുള്ള സെർച്​ കമ്മിറ്റി അംഗങ്ങളാണ്​. സർക്കാർ -ഗവർണർ ഏറ്റുമുട്ടൽ കൂടുതൽ രൂക്ഷമാക്കുന്ന രാജ്​ഭവൻ നടപടിയിൽ സർക്കാർ സ്വീകരിക്കുന്ന നടപടി നിർണായകമാകും.