മോദി ശക്തനായ ഭരണാധികാരിയെന്നാണ് പറഞ്ഞ​തെന്ന് ജി. സുധാകരൻ; ‘അത് പുകഴ്ത്തലല്ല’

ആലപ്പുഴ: മാധ്യമപ്രവർത്തകർക്കെതിരെ രൂക്ഷവിമർശനവുമായി മുതിർന്ന സി.പി.എം നേതാവ് ജി. സുധാകരൻ. മോദി ശക്തനായ ഭരണാധികാരിയെന്നാണ് ഞാൻ പറഞ്ഞ​ത്. അതിനെ മോദിയെ പുകഴ്ത്തിയെന്നാക്കി. നല്ല ഭരണാധികാരിയെന്ന് പറഞ്ഞിട്ടില്ല. വലതുപക്ഷ ഭരണാധികാരിയെന്നും പറഞ്ഞു. കള്ളം പറയുന്ന പത്ര​പ്രവർത്തകർ ഈ പണി​ക്ക് കൊള്ളില്ല. ഭാഷ ഉപയോഗിക്കാൻ ഈ പത്രക്കാർക്ക് അറിയില്ല. ഫോർത്ത് എസ്റ്റേറ്റല്ല, റിയൽ എസ്റ്റേറ്റും റബ്ബർ എസ്റ്റേറ്റിലുമാണ് നിങ്ങളുടെ കണ്ണ്.

രാഷ്ട്രീയ ക്രിമിനലുകളുടെ കൈയിൽ നിന്നും പണം വാങ്ങുന്നവരാണിന്നുള്ളത്. രാഷ്ട്രീയത്തെ ഭീകര പ്രസ്ഥാനമാക്കി മാറ്റുന്നു. സത്യവും നീതിയും കാണിക്കുന്നവരെ കല്ലെറിയു​ന്നു. ഇതാണ് ആലപ്പുഴയിൽ നടക്കുന്നത്. കേരളത്തിൽ നടക്കുന്ന കാര്യം എനിക്കറിയില്ല. ദുർബലനായ ഭരണാധികാരിലെന്ന് മോദിയെ കുറിച്ച് പറഞ്ഞാൽ, ആളുകൾ എന്റെ മുഖത്ത് കാർക്കിച്ച് തുപ്പും. ഞാൻ പറഞ്ഞത് മോദി ഗീതമല്ല. ജനാധിപത്യത്തിലെ ഏകാധിപതിയെന്ന് കൂടി ഞാൻ ആ മുഖാമുഖത്തിൽ പറയുന്നുണ്ട്. മാർകിസസത്തെ കുറിച്ച് ഒന്നു അറിയാത്തവർ നിന്നു പ്രസംഗിക്കുകയാണെന്നും സുധാകരൻ കുറ്റപ്പെടുത്തി.

ഇന്നലെ ഹരിപ്പാട് സി.ബി.സി വാര്യൻ അനുസ്മരണ പരിപാടി തുടങ്ങാൻ വൈകിയ​പ്പോൾ പരിപാടിക്ക് നിൽക്കാതെ സുധാകരൻ ഇറങ്ങിപ്പോയിരുന്നു. സുധാകരൻ പ്രതിഷേധിച്ച് ഇറങ്ങിപ്പോയെന്ന് ചില മാധ്യമങ്ങളിൽ വാർത്ത വന്നിരുന്നു. ഇതാണ് സുധാകരനെ പ്രകോപിപ്പിച്ചതെന്നറിയുന്നു.