മതസ്​പർധ കേസ്​:സെൻകുമാറിനെ അറസ്​റ്റ്​ ചെയ്​ത്​ വിട്ടയച്ചു

തിരുവനന്തപുരം: മതസ്പർധ വളർത്തുന്ന പരാമർശം നടത്തിയെന്ന കേസിൽ മുൻ ഡി.ജി.പി ടി.പി. സെൻകുമാറിനെ അറസ്​റ്റ്​ ചെയ്​ത ശേഷം വിട്ടയച്ചു. തിരുവനന്തപുരം സൈബർ സെല്ലിൽ രജിസ്​റ്റർ ചെയ്ത കേസിലാണ് സെൻകുമാറി​െൻറ അറസ്​റ്റ്​ രേഖപ്പെടുത്തിയത്​. ഹൈകോടതി സെൻകുമാറിന് മുൻകൂർ ജാമ്യം അനുവദിച്ചിരുന്നു. അറസ് റ്റ് ചെയ്യുന്ന പക്ഷം ഉപാധികളോടെ ജാമ്യത്തിൽ പോകാമെന്നും കോടതി നിർദേശിച്ചിരുന്നു. ഇൗ സാഹചര്യത്തിലാണ്​ രണ്ട് ജാമ്യക്കാരെ ഹാജരാക്കുകയും 50,000 രൂപ ജാമ്യം കെട്ടിവെക്കുകയും ചെയ്​തശേഷം സെൻകുമാറിനെ വിട്ടയച്ചത്. മുൻ മേധാവി അറസ്​റ്റിലാകുന്നത് സംസ്ഥാന പൊലീസ് ചരിത്രത്തിൽ ആദ്യമാണ്. 

സ​ർ​വി​സി​ൽ​നി​ന്ന് വി​ര​മി​ച്ച​ശേ​ഷം ഒരു വാരികക്ക് നൽകിയ അഭിമുഖത്തിനിടെ ഒരു മതവിഭാഗത്തെ ലക്ഷ്യമിട്ട് നടത്തിയ പ്രസ്താവനകളാണ്​ വിവാദമായത്​. മതസ്പർധ പരത്തുന്ന പരാമര്‍ശം നടത്തിയെന്ന പരാതിയില്‍ ഇദ്ദേഹത്തിനെതിരെ ജാമ്യമില്ലാ വകുപ്പ് പ്രകാരം പൊലീസ് കേസെടുത്തിരുന്നു. ഇതിനെത്തുടർന്ന്​ ജൂലൈ 29ന് സെൻകുമാർ സൈബർ സെല്ലിനു മുന്നിൽ ഹാജരായി. പരാമർശം മതസ്പർധ വളർത്തുന്നതല്ലെന്നും സ്ഥിതിവിവരക്കണക്കുകൾ ചൂണ്ടിക്കാട്ടിയതാണെന്നും സെൻകുമാർ അന്വേഷണ ഉദ്യോഗസ്ഥന്​ മൊഴി നൽകിയിരുന്നു.

വർഗീയ പരാമർശം നടത്തിയെന്ന് പറയുന്നതു വസ്തുതയല്ലെന്നും സർക്കാറി​െൻറ ചില രേഖകൾ ഉദ്ധരിച്ച് ലേഖക​​െൻറ ചോദ്യങ്ങൾക്കു മറുപടി പറയുകയാണ് ചെയ്തതെന്നുമാണ് സെൻകുമാറി​​െൻറ നിലപാട്. അഭിമുഖം റെക്കോഡ് ചെയ്​തതി​​െൻറ സീഡി വാരിക ലേഖകൻ ക്രൈംബ്രാഞ്ചിനു കൈമാറിയിരുന്നു.  വിവാദമായ അഭിമുഖം സംബന്ധിച്ച രേഖകൾ വാരിക കോടതിയിലും സമർപ്പിച്ചിരുന്നു. അന്വേഷണ സംഘം ഈ രേഖകൾ കോടതിയിൽനിന്ന് സ്വീകരിക്കും. 
പിണറായി സർക്കാർ അധികാരത്തിലെത്തിയ ശേഷം ടി.പി. സെൻകുമാറിനെ ഡി.ജി.പി സ്ഥാനത്തുനിന്ന് നീക്കിയിരുന്നെങ്കിലും സുപ്രീംകോടതി വരെ നീണ്ട നിയമയുദ്ധത്തിനൊടുവിൽ അതേസ്ഥാനത്ത് തിരിച്ചെത്തുകയായിരുന്നു.