ആലപ്പുഴ റെയിൽവേ സ്റ്റേഷനിൽ ഷണ്ടിങ്ങിൽ ഗുരുതര പിഴവ്; സ്റ്റേഷൻ മാസ്റ്റർക്ക് സസ്പെൻഷൻ

ആലപ്പുഴ: റെയിൽവേ സ്​റ്റേഷനിൽ ബോഗികളുടെ ഷണ്ടിങ്ങിൽ ഗുരുതര പിഴവ്​. റെയിൽവേ ഗേറ്റ്​ അടക്കുന്നതിലും വീഴ്ച പറ്റി. ഇതേതുടർന്ന്​ സ്​റ്റേഷൻ മാസ്റ്റർ കെ.എസ്.​ വിനോദിനെ സസ്​പെൻഡ്​ ചെയ്തു. തിങ്കളാഴ്ച രാവിലെ ആറോടെയായിരുന്നു സംഭവം. ഇവിടെ നിന്ന്​ പുറപ്പെടുന്ന ധൻബാദ്​ എക്സ്​പ്രസ്​ ട്രെയിനിന്‍റെ ബോഗികൾ സ്​റ്റേഷനിലെ മൂന്ന്​ ട്രാക്കുകളിലായി കിടന്നതാണ്​ പ്രശ്നമായത്​.

ഇവ ഒരേ ട്രാക്കിലെത്തിച്ച്​ കൂട്ടിയോജിപ്പിക്കുന്നതിൽ കാലതാമസമുണ്ടായി. ഇതോടെ ഇതുവഴി മറ്റ്​ ട്രെയിനുകൾക്കൊന്നും കടന്നുവരാൻ കഴിഞ്ഞില്ല. സ്​റ്റേഷനിൽ ആകെ മൂന്ന്​ ട്രാക്ക്​ മാത്രമാണുള്ളത്​. അവ മൂന്നിലും ബോഗികൾ കിടക്കുകയായിരുന്നു. ഇതോടെ ഇതുവഴി പോകേണ്ട ​ട്രെയിനുകൾ സിഗ്​നൽ ലഭിക്കാനായി​ മണിക്കൂറിലേറെ കാത്തുകിടന്നു. ധൻബാദ് എക്സ്​പ്രസ് ഒന്നര മണിക്കൂർ വൈകിയാണ്​ പുറപ്പെട്ടത്​.

കൊല്ലം ആലപ്പുഴ മെമു, ഏറനാട്​ എക്സ്​പ്രസ്​, കേരള സമ്പർക്ക്​ ക്രാന്തി, അന്ത്യോദയ എക്സ്​പ്രസ്​ എന്നിവയെല്ലാം മണിക്കൂറിലേറെ വൈകി. ഷണ്ടിങ്ങിന്‍റെ സമയത്ത്​ സ്​റ്റേഷന്‍റെ തെക്കുഭാഗത്തെ റെയിൽവേ ഗേറ്റ്​ അടക്കാനും കഴിഞ്ഞില്ല. ഫോൺ തകരാറിലായതിനാൽ നിർദേശം നൽകാൻ കഴിയാതിരുന്നതിനാലാണ്​ ഗേറ്റ്​ അടക്കാതിരുന്നതെന്ന്​ പറയപ്പെടുന്നു. സംഭവമറിഞ്ഞ്​ തിരുവനന്തപുരത്തുനിന്ന്​ ഉന്നത ഉദ്യോഗസ്ഥർ ആലപ്പുഴയിലെത്തി അന്വേഷണം നടത്തി. ഇവരുടെ റിപ്പോർട്ടിന്‍റെ അടിസ്ഥാനത്തിൽ വൈകുന്നേരത്തോടെയാണ്​​ സ്​റ്റേഷൻ മാസ്റ്ററെ സസ്​പെൻഡ്​ ചെയ്തത്​.