ലൈംഗികാതിക്രമം: സി.പി.എം നേതാവിന്‍റെ മുൻകൂർ ജാമ്യ ഹരജിയിലെ വിവരങ്ങൾ വ്യാജമെന്ന്​ പരാതിക്കാരി

കൊച്ചി: ലൈംഗികാതിക്രമക്കേസ്​ ഒത്തുതീർപ്പാക്കിയെന്ന ആലപ്പുഴയിലെ സി.പി.എം നേതാവിന്‍റെ മുൻകൂർ ജാമ്യ ഹരജിയിലെ വിവരങ്ങൾ വ്യാജമെന്ന്​ ആരോപിച്ച്​ പരാതിക്കാരി ഹൈകോടതിയിൽ. കേസ് ഒത്തുതീർപ്പാക്കി പരാതി പിൻവലിച്ചെന്ന് തന്‍റേതായി നൽകിയ സത്യവാങ്മൂലവും അതിലെ ഒപ്പും വ്യാജമാണെന്ന് വ്യക്തമാക്കിയാണ്​ ജനാധിപത്യ മഹിള അസോസിയേഷൻ മുൻ നേതാവുകൂടിയായ പരാതിക്കാരി എതിർ സത്യവാങ്​മൂലം നൽകിയത്​.

കഴിഞ്ഞവർഷം ആഗസ്റ്റ് 27ന് സി.പി.എം മുൻ ലോക്കൽ സെക്രട്ടറി എസ്.എം. ഇക്ബാൽ പാർട്ടി ഓഫിസിൽ പീഡിപ്പിക്കാൻ ശ്രമിച്ചെന്നാണ് കേസ്. പാർട്ടി സെക്രട്ടറിക്ക് പരാതി നൽകിയിട്ടും നടപടിയുണ്ടായില്ല. തുടർന്ന് പൊലീസിന്​ നൽകിയ പരാതിയിൽ കേസെടുത്തെങ്കിലും പ്രതിയെ അറസ്റ്റ് ചെയ്തില്ല. മാത്രമല്ല, വിവിധ കേന്ദ്രങ്ങളിൽനിന്ന് ഭീഷണി ഉയരുകയും ചെയ്തു. ഇതിനിടെ, പ്രതി വീണ്ടും ലോക്കൽ സെക്രട്ടറിയായി തെരഞ്ഞെടുക്കപ്പെടുകയും ഏരിയ സമ്മേളനത്തിൽ പങ്കെടുക്കുകയും ചെയ്തു. ഒരു വർഷത്തിനുശേഷവും പാർട്ടിയിൽനിന്ന്​ നീതി കിട്ടാതെ വന്ന​പ്പോൾ പൊലീസിനെ സമീപിച്ചപ്പോഴാണ് പ്രതി മുൻകൂർ ജാമ്യത്തിന് പരാതിക്കാരുടെ വ്യാജ സത്യവാങ്മൂലം ഹാജരാക്കിയതെന്ന്​ സത്യവാങ്​മൂലത്തിൽ പറയുന്നു.

ഒത്തുതീർപ്പിന് സത്യവാങ്മൂലത്തിൽ ഒപ്പിടാൻ ഹരജിയിലുള്ളത്​ പോലെ എറണാകുളത്തെ ഒരു അഭിഭാഷകന്‍റെയും ഓഫിസിൽ പോയിട്ടില്ല. തുടരെയുള്ള ഭീഷണിമൂലം മാനസികമായി തളർന്ന് കഴിഞ്ഞ മാസം 19ന് രോഗബാധിതയായ താൻ 21, 22 തീയതികളിൽ ആലപ്പുഴ ജില്ല ആശുപത്രിയിൽ ചികിത്സയിലായിരുന്നു. വ്യാജ തെളിവ് ഹാജരാക്കിയ പ്രതിക്കെതിരെ നടപടിയെടുക്കണമെന്നും സത്യവാങ്​മൂലത്തിൽ പറയുന്നു.