‘ഷാഫി ജയിച്ചിട്ട് എനക്ക് കരച്ചിലാ വരുന്നേ... പടച്ചോനോടും അമ്പലത്തിലും ഞാനത്രക്ക് പ്രാർഥിച്ചിന്...’ -വൈറലായി മന്ദിയമ്മയുടെ വിഡിയോ

വടകര: ‘അമ്മേ ന്ന് പറഞ്ഞിട്ടാ ഞമ്മളെ അരികത്ത് വന്നത്. അന്ന് മുതല് പ്രാർഥിക്ക്ന്നുണ്ട് മോനേ ഷാഫി ജയിക്കാൻ.. എനക്ക് ഒറക്ക് തെളിഞ്ഞാലും ഓർമ വരും.. ഞാനത്രക്ക് പടച്ചോനോ​ടും അമ്പലത്തിലും പ്രാർഥിച്ചിന്’ -വടകരയുടെ നായകനായി ജയിച്ചുകയറിയ ഷാഫി പറമ്പിലിനെ കാണാൻ ഊരത്ത് കമ്മനത്താഴെ നിന്ന് കുറ്റ്യാടിയിൽ എത്തിയ മന്ദി എന്ന വയോധികയായ അമ്മയുടെ വാക്കുകളാണിത്.

തെരഞ്ഞെടുപ്പിൽ വൻ ഭൂരിപക്ഷം നേടിയ ഷാഫി, വോട്ടർമാർക്ക് നന്ദി പറയാൻ എത്തുന്നതറിഞ്ഞ് ഊരത്ത് നിന്ന് മന്ദിയമ്മ വളരെ നേരത്തെ ​തന്നെ കുറ്റ്യാടിയിൽ എത്തിയിരുന്നു. ഇത് ശ്രദ്ധയിൽപെട്ട ആരോ മൊബൈലിൽ പകർത്തിയ അവരുടെ സംസാരം ഇപ്പോൾ സോഷ്യൽ മീഡിയയിൽ വൈറലാണ്. പാലക്കാട് നിന്നെത്തിയ ഷാഫി, ‘വടേര’യുടെ മനം എത്രത്തോളം കവർന്നുവെന്നതിന്റെ തെളിവാണ് 58 സെക്കൻഡുള്ള ഈ വിഡിയോ.

‘എനക്ക് കരച്ചിലാ വരുന്നേ.. ഞാനത്രക്കും പടച്ചോനോടും അമ്പലത്തിലും ഒക്കെ പ്രാർഥിച്ചിന്... ജയിക്ക്ന്ന വരെ എനക്ക് ഒറക്ക് തെളിഞ്ഞാലും ഓർമ വരുവേനും... എനക്ക് കൊറേ വയസ്സായി.. ഞാനിപ്പം മരിക്കും... എന്നാലും... ല്ലേ... ’ -വാക്കുകൾ മുഴുമിപ്പിക്കാനാവാതെ മന്ദിയമ്മ വിഷമിക്കുന്നത് വിഡിയോയിൽ കാണാം.

‘വടകരയിൽ എങ്ങനെയിത്ര ഭൂരിപക്ഷം കിട്ടിയെന്ന് ചോദിച്ചാൽ, രാഷ്ട്രീയം പറഞ്ഞ് കിട്ടി എന്നാണ് ഉത്തരം. എന്ത് രാഷ്ട്രീയം എന്ന് ചോദിച്ചാൽ ഈ രാഷ്ട്രീയം എന്നാണ് ഉത്തരം. സ്നേഹം’ എന്ന അടിക്കു​റിപ്പോടെ രാഹുൽ മാങ്കൂട്ടത്തിൽ ഇത് ഫേസ്ബുക്കിൽ പങ്കുവെച്ചിട്ടുണ്ട്. ‘ഇങ്ങനെയുള്ള അമ്മമ്മാരുടെ നാട്ടിൽ വർഗീയതയും ബോംബും കൊണ്ട് മത്സരിക്കാൻ വന്നാൽ എങ്ങനെ ജയിക്കാനാ ടീച്ചറെ.. ഈ പ്രാർത്ഥനകൾ ഏത് ദൈവത്തിനാ തള്ളിക്കളയാൻ തോന്നുക. ഇത്തരം അനേകം അമ്മമാരുടെ പ്രാർത്ഥനയുടെ ശക്തിയാണ് ഷാഫിയുടെ ഈ വലിയ ഭൂരിപക്ഷം...’ -എന്നായിരുന്നു ഒരാളുടെ കമന്റ്.

‘ആ അമ്മയുടെ കണ്ണിലുണ്ട്.... ഒരു മകനെ കാണാൻ കാത്തു നിൽക്കുന്ന അമ്മയുടെ വികാരം.... ഷാഫിക്ക ആ നിങ്ങടെ സമയത്തിൽ അല്പസമയം ഈ അമ്മക്ക് വേണ്ടി മാറ്റി വെക്കുക..... 💙💙💙 ’ എന്ന് മറ്റൊരാളും കമന്റ് ചെയ്യുന്നു. ‘പ്രിയപ്പെട്ട Shafi Parambilനിങ്ങൾ എങ്ങനെയാണ് ജനങ്ങളുടെ ഹൃദയം കീഴടക്കുന്നത് 🥰’, ‘ഇതാണ് ദ റിയൽ വടകര സ്റ്റോറി’ എന്നിങ്ങനെ പോകുന്നു കമന്റുകൾ.

1,14,506 വോട്ടിന്റെ ഭൂരിപക്ഷത്തിലാണ് ഷാഫി പറമ്പിലിനെ വടകരക്കാർ എം.പിയായി തെരഞ്ഞെടുത്തത്. സി.പി.എമ്മിലെ കെ.കെ. ശൈലജ ടീച്ചറായിരുന്നു എതിർസ്ഥാനാർഥി. കഴിഞ്ഞ തവണ കെ. മുരളീധരന് ലഭിച്ചതിനേക്കാൾ 29,729 വോട്ടിന്റെ ഭൂരിപക്ഷമാണ് ഇത്തവണ കോൺഗ്രസ് നേടിയത്.