ഷാർജ ഭരണാധികാരി കൊച്ചിയിലെത്തി

കൊച്ചി: ഷാർജ ഭരണാധികാരിയും യു.എ.ഇ സുപ്രീം കൗൺസിൽ അംഗവുമായ ഡോക്ടർ ഷെയ്ഖ് സുൽത്താൻ ബിൻ മുഹമ്മദ് അൽ ഖാസിമി സ്വകാര്യസന്ദർശനത്തിനായി കൊച്ചിയിലെത്തി. ജില്ലാകലക്ടർ കെ.മുഹമ്മദ് വൈ സഫീറുള്ള, മധ്യമേഖലാ ഐ.ജി പി വിജയൻ, അസിസ്റ്റന്റ് കലക്ടർ ഈശ പ്രിയ, സിയാൽ എം.ഡി വിജെ കുര്യൻ, ലുലു ഗ്രൂപ്പ് ചെയർമാൻ  എം.എ യൂസഫലി, ആലുവ റൂറൽ എസ്.പി എ.വി ജോർജ്ജ് തുടങ്ങിയവർ ചേർന്ന് രാവിലെ 10 15 ഓടെ കൊച്ചി വിമാനത്താവളത്തിൽ എത്തിയ ഷാർജ ഭരണാധികാരിയെ  സ്വീകരിച്ചു.

താലപ്പൊലി, ചെണ്ടമേളം, പുലിക്കളി, കഥകളി, തെയ്യം തുടങ്ങി കേരളത്തിൻെറ വിവിധ സാംസ്കാരിക കലാ രൂപങ്ങൾ ഉൾപ്പെടുത്തിയിട്ടുള്ള വർണാഭമായ സ്വീകരണമാണ് ഷാർജ ഭരണാധികാരിക്കായി കൊച്ചി വിമാനത്താവളത്തിൽ ഒരുക്കിയിരുന്നത്. തുടർന്ന് എം.എ യൂസഫലിയുടെ ഭവന സന്ദർശനത്തിനായി അദ്ദേഹം യാത്രയായി.