ശിവശങ്കറിന്‍റെ ജാമ്യാപേക്ഷ ജൂലൈയിലേക്ക്​ മാറ്റി

ന്യൂഡൽഹി: ലൈഫ് മിഷൻ കോഴക്കേസിൽ ജാമ്യം തേടി മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം. ശിവശങ്കർ സമർപ്പിച്ച അപേക്ഷ സുപ്രീംകോടതി ജൂലൈയിലേക്ക് മാറ്റി. ആരോഗ്യപ്രശ്‌നങ്ങളുണ്ടെങ്കിൽ ഇടക്കാല ജാമ്യത്തിനായി പ്രത്യേക വിചാരണക്കോടതിയെ സമീപിക്കാമെന്നും കോടതി വ്യക്​തമാക്കി.

ആരോഗ്യപ്രശ്നങ്ങൾ ഉള്ളതിനാൽ കോടതി അവധിക്കാലത്തിന് പിരിയുംമുമ്പ്​ കേസ് പരിഗണിച്ച് ഇടക്കാലജാമ്യം നൽകണമെന്ന്​ ശിവശങ്കർ ആവശ്യപ്പെ​ട്ടപ്പോഴാണ്​ ജസ്റ്റിസ് വി. രാമസുബ്രഹ്മണ്യം, ജസ്റ്റിസ് പങ്കജ് മിത്തൽ എന്നിവരടങ്ങിയ ബെഞ്ച്​ വിചാരണക്കോടതി​യെ സമീപിക്കാമെന്ന്​ അറിയിച്ചത്​.

ജാമ്യാപേക്ഷ എതിർത്ത എൻഫോഴ്​സ്​മെന്‍റ്​ ഡയറക്​ടറേറ്റ്​ (ഇ.ഡി) ശിവശങ്കറിന്​ ആരോഗ്യപ്രശ്നങ്ങളില്ലെന്ന്​​ കോടതിയെ അറിയിച്ചു. സസ്​പെൻഷൻ കഴിഞ്ഞ് സര്‍വിസില്‍ കയറിയശേഷം ശിവശങ്കര്‍ കാര്യമായ ചികിത്സക്ക്​ വിധേയനായിട്ടില്ലെന്നും ഇ.ഡിയുടെ അഭിഭാഷകന്‍ ചൂണ്ടിക്കാട്ടി. ശിവശങ്കറിന്‍റെ ജാമ്യാപേക്ഷയില്‍ വിശദമായ മറുപടി സത്യവാങ്മൂലം ഫയല്‍ചെയ്യാന്‍ അനുവദിക്കണമെന്നും ഇ.ഡി ആവശ്യപ്പെട്ടു.