ഷൊര്‍ണൂർ ട്രെയിന്‍ അപകടം; കരാറുകാരനെതിരെ കേസ്

പാലക്കാട്: ഷൊര്‍ണൂരില്‍ ട്രെയിന്‍ തട്ടി മൂന്ന് തൊഴിലാളികള്‍ മരിച്ച സംഭവത്തില്‍ കരാറുകാരനെതിരെ കേസെടുത്തു. ക്രിമിനല്‍ വകുപ്പുകള്‍ പ്രകാരമാണ് കേസ് എടുത്തത്. ശുചീകരണത്തിനായി എത്തിച്ച തൊഴിലാളികളുടെ സുരക്ഷ കരാറുകാരന്‍ ഉറപ്പാക്കിയില്ല എന്നാരോപിച്ചാണ് കേസ്‌. ഇയാള്‍ക്ക് നല്‍കിയ കരാര്‍ റദ്ദാക്കിയതായി റെയില്‍വെ പുറത്തിറക്കിയ വാര്‍ത്താ കുറിപ്പില്‍ അറിയിച്ചു.

അതിന് പുറമെ അപകടത്തില്‍ മരിച്ച തൊഴിലാളികളുടെ കുടുംബത്തിന് ഒരു ലക്ഷം രൂപ വീതം ധനസഹായം നല്‍കുമെന്നും റെയില്‍വെ അറിയിച്ചിട്ടുണ്ട്. കേന്ദ്ര റെയില്‍വെ മന്ത്രി അശ്വിനി വൈഷ്ണവ് ഇന്ന് സംഭവ സ്ഥലം സന്ദര്‍ശിച്ചേക്കും എന്നും റിപ്പോര്‍ട്ടുകളുണ്ട്.

തിരുവനന്തപുരത്തേക്ക് വരുകയായിരുന്നു കേരള എക്സ്പ്രസ്സ് ട്രെയിൻ തട്ടിയാണ് അപകടം. ലക്ഷ്മണന്‍, റാണി, വല്ലി എന്നീ മൂന്ന് തൊഴിലാളികളാണ് മരണപ്പെട്ടത്. മൂന്ന് പേരും തമിഴ്‌നാട് സേലം സ്വദേശികളാണ്.

ഷൊര്‍ണൂര്‍ പാലത്തിൽ ഇന്ന് ഉച്ചയ്ക്കുശേഷമായിരുന്നു സംഭവം. റെയിൽവെയുടെ കരാർ ജീവനക്കാരായ ശുചീകരണ തൊഴിലാളികളാണ് മരിച്ചത്.ട്രെയിൻ വരുന്നത് അറിയാതെ റെയിൽവേ ട്രാക്കിൽനിന്ന് മാലിന്യം പെറുക്കുന്നതിനിടെ നാലുപേരെയും ട്രെയിൻ ഇടിക്കുകയായിരുന്നു. ഇടിയുടെ ആഘാതത്തിൽ നാലുപേരും തൽക്ഷണം മരണപ്പെട്ടു.

റെയിൽവേ പൊലീസും ഷൊർണൂർ പൊലീസും സ്ഥലത്തെത്തി.ജോലി കഴിഞ്ഞ് മടങ്ങുകയായിരുന്ന തൊഴിലാളികള്‍ തിരികെ സ്റ്റേഷനിലേക്ക് മടങ്ങാന്‍ റോഡിന് പകരം അനുമതിയില്ലാത്ത റെയില്‍വെ പാലം ആണ് ഉപയോഗിച്ചത്. ഇതാണ് അപകടത്തിന് വഴി വെച്ചത്. പാലത്തിലൂടെ ട്രെയിനുകള്‍ക്ക് വേഗ നിയന്ത്രണങ്ങള്‍ ഉണ്ടായിരുന്നില്ല.