വാണിജ്യകെട്ടിടത്തിലെ ക്രിസ്ത്യൻ ആരാധനാലയം അടച്ചുപൂട്ടാനുള്ള ഉത്തരവ്​ നടപ്പാക്കണമെന്ന്​ ഹൈകോടതി

കൊച്ചി: പത്തനംതിട്ട ഓമല്ലൂരിൽ വാണിജ്യാവശ്യത്തിനുള്ള കെട്ടിടം വാടകക്കെടുത്ത്​ നടത്തുന്ന ക്രിസ്ത്യൻ ആരാധനാലയം ഉടൻ അടച്ചുപൂട്ടാനുള്ള ജില്ല കലക്ടറുടെ ഉത്തരവ്​ നടപ്പാക്കണമെന്ന്​ ഹൈകോടതി. സന്തോഷ്​മുക്കിൽ തോമസ്​ വർഗീസ്​ എന്നയാളുടെ ഉടമസ്ഥതയിലുള്ള കെട്ടിടത്തിൽ പ്രവർത്തിക്കുന്ന ആരാധനാലയം സംബന്ധിച്ച കലക്ടറുടെ ഉത്തരവ്​ നടപ്പാക്കാനാണ്​ ജസ്റ്റിസ്​ എൻ. നഗരേഷിന്‍റെ നിർദേശം​. ​പത്തനംതിട്ട പൊലീസിനും ഓമല്ലൂർ ഗ്രാമപഞ്ചായത്ത്​ സെക്രട്ടറിക്കുമാണ്​ നിർദേശം നൽകിയത്​​.

വിളവിനാൽ കമേഴ്​സ്യൽ കെട്ടിടത്തിന്‍റെ രണ്ടാംനില ബിനു വാഴമുറ്റം എന്നയാൾ വാടക്കെടുത്താണ്​ അവിടെ ദേവാലയം തുടങ്ങിയത്​. സമീപവാസികൾക്ക് ബുദ്ധിമുട്ടുണ്ടാക്കുന്നവിധം ശബ്ദമലിനീകരണമടക്കം ചൂണ്ടിക്കാട്ടി ആരാധനാലയത്തിന്‍റെ പ്രവർത്തനം നിർത്താൻ പഞ്ചായത്ത്​ നോട്ടീസ്​ നൽകിയെങ്കിലും നടപ്പായില്ല. ഇതേതുടർന്ന്​ അധികൃതർക്ക്​ പരാതി നൽകിയിട്ടും നടപടിയുണ്ടായില്ല. കലക്ടറുടെ അനുമതിയില്ലാതെ ആരാധനാലായങ്ങൾ പ്രവർത്തിക്കരുതെന്ന്​ ചട്ടമുണ്ട്​. കലക്ടർ, ജില്ല പൊലീസ്​ മേധാവി, പൊലീസ്​ സ്​റ്റേഷൻ, പരിസ്ഥിതി മലിനീകരണ നിയന്ത്രണ ബോർഡ്​ തുടങ്ങിയവയുടെയൊന്നും അനുമതിയില്ലാതെയാണ്​ പ്രവർത്തനം.

ഇതിനിടെ നൂറുൽ ഇസ്​ലാം സാംസ്കാരിക സംഘം കേസിലേതിന്​ സമാനരീതിയിൽ നടക്കുന്ന ആരാധനാലയത്തിന്‍റെ പ്രവർത്തനം നിർത്തിവെക്കാൻ പരാതിയെ തുടർന്ന്​ കലക്ടർ ഉത്തരവിട്ടു. എന്നാൽ, സ്ഥലമുടമയും വാടകക്കെടുത്തവരും എതിർകക്ഷികളായ മറ്റ്​ ഉദ്യോഗസ്ഥരുമായുള്ള ബന്ധം നിമിത്തം ഉത്തരവ്​ നടപ്പാക്കിയില്ലെന്നാരോപിച്ച്​ പ്രദേശവാസിയായ മിനി ഷാജി ഹൈകോടതിയെ സമീപിക്കുകയായിരുന്നു. ഇതിലാണ്​ കലക്ടറുടെ ഉത്തരവ്​ നടപ്പാക്കാൻ നിർദേശിച്ചിരിക്കുന്നത്​​. ഒത്തുകളിച്ച ഉദ്യോഗസ്ഥർക്കെതിരെ അന്വേഷണം നടത്താൻ സർക്കാറിനോട്​ നിർദേശിക്കണമെന്ന ആവശ്യവും ഹരജിയിൽ ഉന്നയിച്ചിട്ടുണ്ട്​.

നിയമപരമായ അനുമതിയില്ലാതെ പ്രവർത്തിക്കുന്ന ആരാധനാലയങ്ങളും പ്രാർഥന കേന്ദ്രങ്ങളും പൂട്ടണമെന്നായിരുന്നു നൂറുൽ ഇസ്​ലാം കേസിൽ ഹൈകോടതിയുടെ ഉത്തരവ്​. മറ്റ് ആവശ്യങ്ങൾക്ക് അനുമതി തേടി നിർമിച്ച കെട്ടിടങ്ങൾ ആരാധനാലയങ്ങളാക്കാനുള്ള അപേക്ഷകൾ അനിവാര്യസാഹചര്യത്തിലൊഴികെ കലക്ടർമാർ അനുവദിക്കരുതെന്നും അനധികൃതമായി പ്രവർത്തിക്കുന്നവക്കെതിരെ പൊലീസ്​ നടപടിയെടുക്കണമെന്നും ഉത്തരവിൽ വ്യക്തമാക്കിയിരുന്നു