ഷുഹൈബ് വധം: വാളുകള്‍ കണ്ടെടുത്തു; കാര്‍ കസ്​റ്റഡിയില്‍

മട്ടന്നൂര്‍: യൂത്ത് കോണ്‍ഗ്രസ് നേതാവ്​ ഷുഹൈബിനെ വെട്ടിക്കൊലപ്പെടുത്താന്‍ ഉപയോഗിച്ചതെന്ന്​ കരുതുന്ന വാളുകള്‍ പൊലീസ്​ കണ്ടെത്തി. ഷുഹൈബ്​ കൊല്ലപ്പെട്ട എടയന്നൂരിനടുത്ത തെരൂർ വെള്ളപ്പറമ്പ് മേഖലയില്‍ നിന്നാണ്​ വാളുകൾ കണ്ടെത്തിയത്​. വാളുകളില്‍  ചോരപ്പാടുകളുണ്ട്. അധികം പഴക്കവുമില്ല.  ഇവ ഫോറന്‍സിക് പരിശോധനക്ക്​ അയക്കുമെന്ന്​ പൊലീസ്​ പറഞ്ഞു. 

ഷുഹൈബിനെ വെട്ടിവീഴ്​ത്തിയ ശേഷം കുമ്മാനം വഴി രക്ഷപ്പെട്ട പ്രതികള്‍ വെള്ളപ്പറമ്പില്‍ വാളുകള്‍ ഉപേക്ഷിച്ചതാ​െണന്നാണ്​ പൊലീസിന്​ ലഭിച്ച  വിവരം. വെള്ളപ്പറമ്പിൽനിന്ന്​ ഒരു വാൾ നേരത്തേ കണ്ടെത്തിയിരുന്നു.  ഇതേത്തുടർന്നാണ്​ ഇന്നലെ ഉച്ചയോടെ പൊലീസ്​ ഇവിടെ വ്യാപക തിരച്ചിൽ നടത്തിയത്​. സി.ഐ എ.വി. ജോണ്‍, എസ്.ഐ കെ. രാജീവ് കുമാര്‍ എന്നിവരുടെ നേതൃത്വത്തിലായിരുന്നു റെയ്​ഡ്. പ്രതികളെ പിടികൂടിയിട്ടും ആയുധം കണ്ടെത്താത്തത് ഇന്നലെ ഹൈകോടതിയുടെ വിമര്‍ശനത്തിന് ഇടയാക്കിയിരുന്നു.    

പ്രതികള്‍ രക്ഷപ്പെടാന്‍ ഉപയോഗിച്ചതെന്ന് കരുതുന്ന മാരുതി ആള്‍ട്ടോ കാറും പൊലീസ് കസ്​റ്റഡിയിലെടുത്തു. കാര്‍ വിരലടയാള വിദഗ്ധര്‍ പരിശോധന നടത്തി. ഷുഹൈബിനെ ആക്രമിക്കാൻ പ്രതികളെത്തിയ വെള്ള വാഗൺ-ആർ കാർ നേരത്തേ അരോളിയിൽനിന്ന്​ പൊലീസ്​ കസ്​റ്റഡിയിലെടുത്തിരുന്നു. പൊലീസ് കസ്​റ്റഡിയിൽ  വിട്ടുകിട്ടിയ രണ്ട് പ്രതികളെ കോടതിയില്‍ ഹാജരാക്കി. സംഭവവുമായി ബന്ധപ്പെട്ട് ആദ്യം അറസ്​റ്റ്​ ചെയ്ത തില്ലങ്കേരി വഞ്ഞേരിയിലെ എം.പി. ആകാശ്, മുടക്കോഴി മലക്ക്​ സമീപത്തെ റിജിന്‍രാജ് എന്നിവരെയാണ് തെളിവെടുപ്പിനുശേഷം കോടതിയില്‍ ഹാജരാക്കിയത്.