കെ. സുധാകരൻ നാളെ നിരാഹാരസമരം അവസാനിപ്പിക്കും

കണ്ണൂർ: ഷുഹൈബ്​ വധത്തിൽ സി.ബി.​െഎ അന്വേഷണം ആവശ്യപ്പെട്ട്​ കോൺഗ്രസ്​ രാഷ്​​ട്രീയകാര്യ സമിതിയംഗം കെ. സുധാകരൻ നടത്തുന്ന സമരം  ചൊവ്വാഴ്​ച അവസാനിപ്പിക്കും. സി.ബി.​െഎ അന്വേഷണത്തിന്​ സർക്കാർ തയാറല്ലെന്ന്​ മുഖ്യമന്ത്രി പിണറായി വിജയൻ വ്യക്​തമാക്കുകയും  സമരം യു.ഡി.എഫ്​ ഏറ്റെടുക്കാൻ തീരുമാനിക്കുകയും​ ചെയ്​തതിനെ  തുടർന്നാണിത്​. 

കൊലപാതകത്തെ തുടർന്ന്​ ഡി.സി.സി പ്രസിഡൻറ്​ സതീശൻ പാച്ചേനിയും തുടർന്ന്​ യൂത്ത്​ കോൺഗ്രസ്​ ​പാർല​െമൻറ്​ മണ്ഡലം പ്രസിഡൻറ്​ ജോഷി കണ്ടത്തിലും 24 മണിക്കൂർ വീതം ഉപവസിച്ചതി​​െൻറ തുടർച്ചയായാണ്​ ഫെബ്രുവരി 19ന്​  ​കെ. സുധാകരൻ  കലക്​ടറേറ്റ്​​ പടിക്കൽ നിരാഹാരം തുടങ്ങിയത്​. 48 മണിക്കൂർ നിരാഹാരം പിന്നീട്​ അനിശ്ചിതകാലത്തേക്ക്​ നീട്ടുകയായിരുന്നു. ആരോഗ്യ നില വഷളായപ്പോൾ   സമരം അവസാനിപ്പിക്കാൻ  ജില്ല ഭരണകൂടം  അഭ്യർഥിച്ചുവെങ്കിലും സുധാകരൻ തള്ളി. 

സി.ബി.​െഎ ​അന്വേഷണ പ്രഖ്യാപനമെന്ന മുഖ്യ ആവശ്യം നേടാനാവാതെയാണ്​ ഒമ്പതാം ദിനത്തിൽ  സുധാകരൻ നിരാഹാരം അവസാനിപ്പിക്കുന്നത്​.  ചൊവ്വാഴ്​ച മുൻ മുഖ്യമന്ത്രി ഉമ്മൻ ചാണ്ടി, ​മുൻ കേന്ദ്രമന്ത്രി വയലാർ രവി, കെ.സി. വേണുഗോപാൽ എം.പി തുടങ്ങിയ നേതാക്കൾ സമരപ്പന്തലിലെത്തുന്നുണ്ട്​. 

പിണറായി സർക്കാർ സി.ബി.​െഎ അ​േന്വഷണം പ്രഖ്യാപിക്കില്ലെന്ന്​  തുടക്കത്തിലേ  അറിയാമായിരുന്നു​വെന്ന്​ സുധാകരൻ പറഞ്ഞു. സി.ബി.​െഎ അന്വേഷണത്തിന്​ തയാറാണെന്ന്​ മന്ത്രി എ.കെ. ബാലൻ കണ്ണൂരിൽ പറഞ്ഞത്​ ജില്ല നേതൃത്വത്തി​​െൻറ പങ്ക്​ അറിയാതെയാകും. സി.പി.എമ്മിന്​ എന്തോ മറച്ചുവെക്കാനുണ്ട്​. അതുകൊണ്ടാണ്​ സി.ബി.​െഎക്ക്​ കൈമാറുന്നതി​നെ ഭയക്കുന്നത്​. ഷുഹൈബ്​  വധത്തിൽ സി.പി.എം ജില്ല നേതൃത്വത്തിന്​ പങ്കുണ്ടെന്ന്​ ഇതോടെ വ്യക്​തമായി -സുധാകരൻ പറഞ്ഞു.