മുല്ലപ്പെരിയാർ ഡാമിന്‍റെ ഷട്ടറുകൾ വീണ്ടും ഉയർത്തുന്നു; തമിഴ്​നാട്​ കൂടുതൽ വെള്ളം കൊണ്ടുപോകണമെന്ന്​ മന്ത്രി

കുമളി: മുല്ലപ്പെരിയാർ ഡാമിന്‍റെ ഷട്ടറുകൾ കൂടുതൽ ഉയർത്തുന്നു. തുറന്നുവെച്ചിരിക്കുന്ന ഷട്ടറുകളാണ് വീണ്ടും​ ഉയർത്തുന്നത്​. മൂന്ന്​ ഷട്ടറുകൾ 65 സെ.മീറ്റർ ആയാണ്​ ഉയർത്തുക. 11 മണിയോടെയായിരിക്കും ഇവ ഉയർത്തുക. 1650 ഘനയടി വെള്ളം ഒഴുക്കിവിടാനാണ്​ തീരുമാനം.

വെള്ളിയാഴ്ച രാത്രി ഡാമിലെ ഒരു ഷട്ടർ കൂടി 30 സെന്‍റിമീറ്റർ ഉയർത്തി വെള്ളം പുറത്തേക്ക് വിട്ടിരുന്നു. നിലവിൽ 825 ക്യൂമിക്സ് വെള്ളമാണ് പുറത്തേക്ക് വിടുന്നത്​.

കേരളത്തിന്‍റെ ആവശ്യം പരിഗണിച്ചാണ് ഒരു ഷട്ടർ കൂടി തുറന്നത്. രണ്ട് ഷട്ടറുകള്‍ വഴി 550 ഘനയടി ഇന്നലെ രാവിലെ മുതല്‍ തുറന്നുവിട്ടിട്ടും ജലനിരപ്പ് കുറയാത്തതിനെ തുടർന്നാണ് നടപടി. 138.85 അടിയിലാണ് ഇപ്പോഴും ജലമുള്ളത്.

മുല്ലപ്പെരിയാറിലെ ജലം രാത്രിയോടെയാണ്​ ഇടുക്കി റിസർവോയറിലെത്തിയത്​. കുറഞ്ഞ ശക്തിയില്‍ വെള്ളമൊഴുകിയതുകൊണ്ടാണ് ഇത്രയും വൈകാന്‍ കാരണം. മുല്ലപ്പെരിയാറിലെ വെള്ളം ഇടുക്കി ഡാമില്‍ സംഭരിക്കാനാകുമെന്നാണ് ഡാം അധികൃതരുടെ കണക്കുകൂട്ടല്‍.

അതേസമയം, തമിഴ്​നാട്​ കൂടുതൽ വെള്ളം കൊണ്ടുപോകണമെന്ന് ജലവിഭവ മന്ത്രി റോഷി അഗസ്റ്റിൻ ആവശ്യപ്പെട്ടു. സ്​പിൽവേ വഴി കൂടുതൽ വെള്ളം തുറന്നുവിടണം. റൂൾ കർവിലേക്ക്​ ജലനിപ്പ്​ എത്തിക്കണം. ജലനിരപ്പ്​ താഴ്​ത്താൻ കഴിയാത്തത്​ തമിഴ്​നാടിന്‍റെ വീഴ്ചയാണ്​. അതേസമയം, 5000 ഘനയടി തുറന്നുവിട്ടാലും പെരിയാർ തീരത്ത്​ പ്രശ്​നമുണ്ടാകില്ലെന്നും അദ്ദേഹം പറഞ്ഞു​.