നമ്പിനാരായണനെ പ്രതിയാക്കിയത്​ ഐബിയും റോയും പറഞ്ഞി​ട്ടെന്ന വാദത്തിലുറച്ച്​ സിബി മാത്യൂസ്

തിരുവനന്തപുരം: നമ്പിനാരായണനെ പ്രതിയാക്കിയത്​ ഐബിയും റോയും പറഞ്ഞി​ട്ടെന്ന വാദത്തിലുറച്ച്​ സിബി മാത്യൂസ്​. ചാര​ക്കേസ്​ ശരിയായി അന്വേഷിച്ചാൽ സത്യം പുറത്തുവരുമെന്നും സിബി മാത്യൂസ്​ പറയുന്നു. ജില്ലാ കോടതിയിൽ സമർപ്പിച്ച മുൻകൂർ ജാമ്യപേക്ഷയിൽ നടന്ന വാദത്തിലാണ്​ ഇക്കാര്യം ആവർത്തിച്ചത്​. ചാര​ക്കേസിൽ നമ്പി നാരായണനെ പ്രതിയാക്കിയത്​ തന്‍റെ നേതൃത്വത്തിലുള്ള പൊലീസ്​ സേനയുടെ താൽപര്യപ്രകാരമല്ല. ഐബിയും റോയും നൽകിയ നിർദേശത്തിലാണ്​ പൊലീസ്​ കേസെടുത്തതെന്നും അദ്ദേഹം ആവർത്തിച്ചു.

കഴിഞ്ഞയാഴ്ച ഐ.എസ്​.ആർ.ഒ ചാരക്കേസിൽ നമ്പി നാരായണന്‍റെ അറസ്റ്റ്​ രേഖകളോ തെളി​വോ ഇല്ലാതെയാണ്​ നടത്തിയതെന്ന്​ സി.ബി.ഐ സത്യവാങ്​മൂലം സമർപ്പിച്ചിരുന്നു. ഹൈകോടതിയിൽ നൽകിയ സത്യവാങ്​മൂലത്തിൽ ഗൂഡാലോചനയുടെ മുഖ്യകണ്ണികൾ ഉദ്യോഗസ്ഥരാണെന്നും വെളിപ്പെടുത്തിയിരുന്നു​. പ്രതികളായ ഉദ്യോഗസ്ഥർക്ക്​ ജാമ്യം നൽകിയാൽ സാക്ഷികളെ സാധീനിക്കാൻ സാധ്യതയുണ്ടെന്നും സി.ബി.ഐ സത്യവാങ്​മൂലത്തിൽ വ്യക്​തമാക്കിയിരുന്നു.

ഐ.എസ്.ആര്‍.ഒ ചാരക്കേസ് ഗൂഢാലോചനയില്‍ മുൻ അന്വേഷണ ഉദ്യോഗസ്ഥരായ സിബി മാത്യൂസും ആര്‍.ബി. ശ്രീകുമാറും ഉൾപ്പടെ 18 പേരെ പ്രതികളാക്കി സി.ബി.ഐ നേരത്തെ എഫ്.ഐ.ആര്‍ സമര്‍പ്പിച്ചിരുന്നു. ഇതിന്​ പിന്നാലെ നാ​ലാം പ്ര​തി​യും അ​ന്വേ​ഷ​ണ ഉ​ദ്യോ​ഗ​സ്ഥ​നു​മാ​യി​രു​ന്ന സി​ബി മാ​ത്യൂ​സ്​ ജാമ്യാപേക്ഷ കോടതിയിൽ ഫയൽ ചെയ്തിരുന്നു.ഇതിന്‍റെ വാദത്തിനിടയിലാണ്​ സിബി മാത്യൂസ്​ ഇക്കാര്യം ആവർത്തിച്ചത്​.