ആൺ, പെൺ വ്യത്യാസമില്ലാത്ത ഇരിപ്പിടം; പരാമർശമുള്ളത്​ അനൗദ്യോഗിക രേഖയിലെന്ന്​ മന്ത്രി ശിവൻകുട്ടി

തിരുവനന്തപുരം: സംസ്ഥാനത്തെ സ്കൂളുകളി​ൽ ആൺ, പെൺ വ്യത്യാസമില്ലാത്ത ഇരിപ്പിടം ഒരുക്കുന്നത്​ സംബന്ധിച്ച പരാമർ​ശം കരിക്കുലം കോർ കമ്മിറ്റി അംഗങ്ങളുടെ ചർച്ചക്കുവേണ്ടി തികച്ചും അനൗദ്യോഗികമായി നൽകിയ കരട്​ രേഖയിലാണ്​ ഉൾപ്പെടുത്തിയതെന്ന്​ പൊതുവിദ്യാഭ്യാസ മന്ത്രി വി. ശിവൻകുട്ടി നിയമസഭയിൽ അറിയിച്ചു.

കോർ കമ്മിറ്റി അംഗങ്ങളുടെയും വിദ്യാഭ്യാസ വിദഗ്​ധരുടെയും പരിശോധനക്കും മെച്ചപ്പെടുത്തലിനും ശേഷമേ ഈ രേഖ ഔദ്യോഗികമായി പ്രസിദ്ധീകരിക്കൂവെന്നും പി. ഉ​ബൈദുല്ലയെ മന്ത്രി രേഖാമൂലം അറിയിച്ചു. സ്കൂൾ പാഠ്യപദ്ധതി ചട്ടക്കൂട്​ തയാറാക്കുന്നതിന്​ പൊതുജന ചർച്ചക്കായുള്ള കരട്​ കുറിപ്പിലാണ്​ ലിംഗഭേദമില്ലാത്ത ഇരിപ്പിടം നടപ്പാക്കുന്നത്​ ചർച്ചക്കായി ഉൾപ്പെടുത്തിയിരുന്നത്​.

മതസംഘടനകളിൽനിന്ന്​ ഉൾപ്പെടെ പ്രതിഷേധം കനത്തതോടെ പരിഷ്​കരിച്ചിറക്കിയ കുറിപ്പിൽനിന്ന്​ ഇരിപ്പിടത്തിലെ സമത്വം എന്ന നിർദേശം ഒഴിവാക്കിയിരുന്നു. പാഠ്യപദ്ധതി പരിഷ്​കരണത്തിന്‍റെ ഭാഗമായി ഫോക്കസ്​ മേഖലകളുമായി ബന്ധപ്പെട്ട വിശാലമായ ജനകീയ ചർച്ച നടത്താനാണ്​ ഉദ്ദേശിക്കുന്നതെന്നും മന്ത്രി പറഞ്ഞു. ജെൻഡർ ന്യൂട്രൽ യൂനിഫോം നടപ്പാക്കാൻ​ പൊതുവിദ്യാഭ്യാസ വകുപ്പ്​ സ്കൂളുകൾക്ക്​ നിർദേശം നൽകിയിട്ടില്ല. സ്കൂളിലെ യൂനിഫോം രീതികൾ തീരുമാനിക്കുന്നത്​ പി.ടി.എ ആണ്​. ജെൻഡർ ന്യൂട്രൽ യൂനിഫോം നടപ്പാക്കിയ സ്കൂളുകളുടെ കണക്കെടുപ്പ്​ നടത്തിയിട്ടില്ലെന്നും മന്ത്രി പറഞ്ഞു​.