വൈദ്യുതി ബില്ലിന്റെ പേരിൽ എസ്​.എം.എസ് തട്ടിപ്പ്​; മുന്നറിയിപ്പുമായി കെ.എസ്​.ഇ.ബി

തൃശൂർ: ബിൽ അടച്ചില്ലെന്നും വൈദ്യുതി വിച്ഛേദിക്കുമെന്നും​ പറഞ്ഞ്​ കെ.എസ്​.ഇ.ബിയുടെ പേരിൽ എസ്​.എം.എസ്​ തട്ടിപ്പ്​. കണക്​ഷൻ വിച്ഛേദിക്കൽ ഒഴിവാക്കാൻ ആപ്​ ഇൻസ്റ്റാൾ ചെയ്യിപ്പിച്ച്​ മൊബൈൽ ഫോണിലെ വിവരങ്ങൾ ചോർത്തിയാണ്​ തട്ടിപ്പ്​ നടക്കുന്നത്​.

ബാങ്ക്​ അക്കൗണ്ടിൽനിന്ന്​ വൻതുക നഷ്ടപ്പെട്ടതായി ഉപഭോക്താക്കളിൽനിന്ന്​ പരാതി ലഭിച്ചതിനെത്തുടർന്ന്​ കെ.എസ്​.ഇ.ബി ചെയർമാൻ സൈബർ സെല്ലിനെ അറിയിച്ചു. അന്വേഷണം നടക്കുന്നതായി സൈബർ പൊലീസ്​ അറിയിച്ചു.

രണ്ടാഴ്ച മുമ്പ്​ മുതലാണ്​ വൈദ്യുതി വിച്ഛേദിക്കാൻ പോവുകയാണെന്ന്​ കാണിച്ച്​ മൊബൈലിൽ മെസേജ്​ വന്ന്​ തുടങ്ങിയത്​. ബന്ധപ്പെടാൻ പറഞ്ഞ്​ മെസേജിൽ പല നമ്പറുകളും കൊടുത്തിട്ടുമുണ്ട്​. ആ നമ്പറിൽ വിളിക്കുമ്പോൾ ഇംഗ്ലീഷിലും ഹിന്ദിയിലും സംസാരിക്കുന്നവരാണ്​ ഫോൺ എടുത്തത്​. ഇവരാണ്​ ബില്ലടച്ചതായി രേഖകളിൽ കാണുന്നില്ലെന്ന്​ അറിയിക്കുന്നത്​. ബിൽ അടച്ചെന്ന്​ പറഞ്ഞാൽ അത്​ സോഫ്​റ്റ്​വെയറിൽ കയറിയിട്ടില്ലെന്നും ഉറപ്പാക്കാൻ ഒരു ആപ്​ ഡൗൺലോഡ്​ ചെയ്യാനും ആവശ്യപ്പെടും.

തുടർന്ന്​ ചെറിയ തുക നിക്ഷേപിച്ച്​ ഒ.ടിപി ആവശ്യപ്പെടുകയാണ്​ പതിവ്​. ഇവ ഇൻസ്റ്റാൾ ചെയ്താൽ ടെലിഫോണിന്‍റെ നിയന്ത്രണം സംഘത്തിന്​ ലഭിക്കുകയും ബാങ്ക്​ അക്കൗണ്ട്​ ഉൾപ്പെടെ നടത്തി വൻ കൊള്ള നടത്തുകയും ചെയ്യും. കെ.എസ്​.ഇ.ബി ജീവനക്കാർ ഇംഗ്ലീഷിലും ഹിന്ദിയിലും സംസാരിക്കില്ലെന്ന്​ ഉറപ്പുള്ളവർ ഫോൺ കട്ട്​ ചെയ്യാറാണ്​ പതിവ്​.

ഏറെപേർ ഇതിനകം കെ.എസ്​.ഇ.ബിയിൽ വിളിച്ച്​ പരാതിപ്പെട്ടു. 95 ശതമാനത്തിലധികം പരാതിക്കാർക്കും പണം നഷ്ടപ്പെട്ടിട്ടില്ലെന്നത്​ ആശ്വാസകരമാണെന്ന്​ കെ.എസ്​.ഇ.ബി അധികൃതർ അറിയിച്ചു.

പണം നഷ്ടപ്പെട്ട ഏതാനും പേർ കെ.എസ്​.ഇ.ബിയിലും പരാതി തന്നിട്ടുണ്ട്​. ഇത്തരം തട്ടിപ്പുകളിൽപെടാതിരിക്കാൻ 90 ലക്ഷം ഉപഭോക്താക്കൾക്കും കെ.എസ്​.ഇ.ബി മെസേജ്​ അയച്ചുവരുകയാണ്​. ഇതുവരെ പകുതിപേർക്ക്​ അയച്ചതായും വരുംദിവസങ്ങളിൽ പൂർത്തിയാക്കുമെന്നും​ അധികൃതർ അറിയിച്ചു. പണമടക്കുന്ന കെ.എസ്​.ഇ.ബി കൗണ്ടറുകളുടെ സമയം തീരുന്നതിന്​ മുമ്പ്​ വരെ കുടിശ്ശിക ബിൽ അടക്കാൻ സൗകര്യമുണ്ടാകും. അതിനാൽ വൈകീട്ട്​ മൂന്നിന്​ ശേഷം അടവ്​ മുടങ്ങിയവരുടെ വൈദ്യുതിബന്ധം വി​ച്ഛേദിക്കില്ലെന്നും​ കെ.എസ്​.ഇ.ബി അറിയിച്ചു. ആരെങ്കിലും ഫോണിൽ വിളിച്ച്​ പണമടക്കാനോ ഏതെങ്കിലും വ്യാജ ആപ്പുകൾ ​ ഡൗൺലോഡ്​ ചെയ്യാൻ ആവശ്യപ്പെടുകയോ ചെയ്താൽ 1912 നമ്പറിൽ വിളിക്കാനും നിർദേശിച്ചു.