ലാവലിന്‍ കേസില്‍ പിണറായി കുറ്റവിമുക്തന്‍

െകാച്ചി: എസ്.എന്‍.സി ലാവ​ലിന്‍ കേസില്‍ മുഖ്യമന്ത്രി പിണറായി വിജയൻ വിചാരണ നേരിടേണ്ടതില്ലെന്ന്​ ഹൈകോടതിയും. കേസില്‍ പിണറായി അടക്കം പ്രതികളെ കുറ്റമുക്തരാക്കിയ വിചാരണ കോടതി ഉത്തരവിനെതിരെ സി.ബി.​െഎ നൽകിയ ഹരജി ഭാഗികമായി തള്ളിയാണ്​ സിംഗിൾ ബെഞ്ചി​​െൻറ ഉത്തരവ്​. ഏഴാം പ്രതിയായ പിണറായിക്ക്​ പുറമെ ഒന്നാം പ്രതിയും മുന്‍ ഊര്‍ജ പ്രിന്‍സിപ്പല്‍ സെക്രട്ടറിയുമായ കെ. മോഹനചന്ദ്രന്‍, എട്ടാം പ്രതിയും മുന്‍ ഊര്‍ജ ജോ. സെക്രട്ടറിയുമായ എ. ഫ്രാന്‍സിസ് എന്നിവരെ വിചാരണ കൂടാതെ കുറ്റമുക്തരാക്കിയ നടപടി ഹൈകോടതി ശരിവെച്ചു.

അതേസമയം, രണ്ടുമുതൽ നാലുവരെ പ്രതികളായ കെ.എസ്​.ഇ.ബി മുൻ ചീഫ് അക്കൗണ്ട്സ് ഓഫിസർ കെ.ജി. രാജശേഖരന്‍ നായര്‍, മുൻ ചെയർമാൻ ആര്‍. ശിവദാസന്‍, മുന്‍ ചീഫ് എന്‍ജിനീയര്‍ കസ്തൂരിരംഗ അയ്യര്‍ എന്നിവരെ കുറ്റമുക്തരാക്കിയ സി.ബി​.െഎ കോടതി ഉത്തരവ്​ റദ്ദാക്കിയ കോടതി, മൂവരും വിചാരണ നേരിടണമെന്ന്​ ഉത്തരവിട്ടു. കെ.എസ്​.ഇ.ബിയും കാനഡയിലെ ​എസ്​.എൻ.സി ലാവലിൻ കമ്പനിയും തമ്മിലുണ്ടാക്കിയ ​ൈവദ്യുതി പദ്ധതികളുടെ നവീകരണ കരാറിലുൾപ്പെടെ വൈദ്യുതി മന്ത്രിയായിരുന്ന പിണറായിക്കും മറ്റ്​ രണ്ടുപേർക്കും നേരിട്ട്​ പങ്കില്ലെന്ന്​ വ്യക്തമാക്കിയാണ്​ ഇവർ വിചാരണ നേരിടേണ്ടതില്ലെന്ന്​ കോടതി ഉത്തവിട്ടത്​.

പിണറായിയെ തിരഞ്ഞുപിടിച്ച്​ പ്രതിയാക്കുകയായിരുന്നെന്ന്​ വ്യക്തമാണ്​. അതിനുശേഷം വന്ന മന്ത്രിമാരും ലാവ​ലിൻ കമ്പനിയുമായി ആശയവിനിയമയം നടത്തിയിട്ടുണ്ടെങ്കിലും അവരെയൊന്നും സി.ബി.​െഎ പ്രതിചേർത്തിട്ടില്ല. പിണറായിക്കും മോഹനച​ന്ദ്രനും ഫ്രാൻസിസിനും കേസി​​െൻറ പ്രാരംഭഘട്ടത്തിൽ ദുരുപദിഷ്​ടപരമായ പങ്കാളിത്തമുള്ളതായി സി.ബി.​െഎപോലും ആരോപിച്ചിട്ടില്ല. ​കരാറിലെ പങ്കാളിയായ കെ.എസ്​.ഇ.ബിക്ക്​ പുറത്തുള്ളവരാണ്​ ഇവർ​. സ്വന്തമായി ഏതെങ്കിലും തരത്തിലുള്ള നേട്ടമുണ്ടാക്കിയതായോ കമ്പനിക്ക്​ ഇവരുടെ പ്രവൃത്തികൾമൂലം ലാഭം ഉണ്ടായതായോ പറയാനാവില്ല. ഇവരെ കേസുമായി ബന്ധപ്പെടുത്തുന്ന തെളിവുകളില്ല. അഴിമതി നിരോധന നിയമ പ്രകാരം ഇവ​ർക്കെതിരെ കേസ്​ നിലനിൽക്കില്ലെന്നും കോടതി വ്യക്തമാക്കി.

അതേസമയം, നവീകരണ പദ്ധതി കരാറുകൾ രൂപകൽപന ചെയ്​തത്​ കെ.എസ്​.ഇ.ബി ഉദ്യോഗസ്ഥരാണ്​. കരാറുണ്ടാക്കാൻ ചെയർമാനും ഭാരവാഹികളും അനാവശ്യ തിടുക്കം കാട്ടിയതായി പ്രഥമദൃഷ്​ട്യ വ്യക്തമാണ്​. ഉദ്യോഗസ്ഥർക്കോ ഇവർ മൂലം ലാവ​ലിൻ കമ്പനിക്കോ അനർഹമായ നേട്ടം ഉണ്ടായിട്ടുണ്ടോയെന്ന്​ പരിശോധി​േക്കണ്ടതുണ്ട്​. കനേഡിയൻ കമ്പനിയുമായി ഇവർക്ക്​ അവിശുദ്ധ ബന്ധമുണ്ടായോയെന്നും പൊതുതാൽപര്യത്തിനും ​െക.എസ്​.ഇ.ബിയുടെ താൽപര്യത്തിനും വിരുദ്ധമായി പ്രവർത്തിച്ചിട്ടുണ്ടോയെന്നും തിരിച്ചറിയേണ്ടതുണ്ട്​. ഇൗ സാഹചര്യത്തിൽ ഇവർ വിചാരണ നേരിടേണ്ടത്​ അനിവാര്യമാണ്​. ദുരുദ്ദേശ്യപരമായ നടപടികൾ അവരിൽനിന്നുണ്ടായിട്ടില്ലെങ്കിൽ വിചാരണയിലൂടെ തെളിയ​െട്ടയെന്നും കോടതി വ്യക്തമാക്കി.

1996 മുതല്‍ പിണറായി വൈദ്യുതി മന്ത്രിയായിരിക്കെ പന്നിയാര്‍, ചെങ്കുളം, പള്ളിവാസല്‍ ജലവൈദ്യുതി പദ്ധതികളുടെ നവീകരണവുമായി ബന്ധപ്പെട്ട് ലാവലിനുമായി ഉണ്ടാക്കിയ കരാറാണ് പിന്നീട് കേസിനിടയാക്കിയ ആരോപണങ്ങള്‍ക്ക് കാരണമായത്. കരാറിലൂടെ പൊതുഖജനാവിന് കോടികളുടെ നഷ്​ടം വന്നിട്ടുണ്ടെന്നാണ് സി.ബി.ഐയുടെ കേസ്. എന്നാല്‍, 2013 നവംബറില്‍ പിണറായി അടക്കം പ്രതികളെ കുറ്റമുക്തരാക്കി തിരുവനന്തപുരം സി.ബി.ഐ കോടതി ഉത്തരവിട്ടു. ഈ വിധിക്കെതിരെയാണ്​ സി.ബി.ഐ ഹൈകോടതിയില്‍ റിവിഷന്‍ ഹരജി നല്‍കിയത്​.