ബി.ജെ.പിയിൽ ചേരാൻ ചർച്ച നടത്തിയത് ഇ.പി ജയരാജൻ തന്നെ, 90 ശതമാനം ചർച്ചകളും പൂർത്തിയായപ്പോൾ പിന്മാറി -ശോഭ സുരേന്ദ്രൻ

ആലപ്പുഴ: ബി.ജെ.പിയിൽ വരാൻ ആഗ്രഹം പ്രകടിപ്പിച്ച സി.പി.എമ്മിന്‍റെ ഉന്നത നേതാവ്​ എൽ.ഡി.എഫ്​ കൺ​വീനർ ഇ.പി. ജയരാജനാണെന്ന്​ ബി.ജെ.പി നേതാവും ആലപ്പുഴ എൻ.ഡി.എ സ്ഥാനാർഥിയുമായ ശോഭ സുരേന്ദ്രന്‍റെ വെളിപ്പെടുത്തൽ. ആലപ്പുഴയിൽ വാർത്തസമ്മേളനത്തിലാണ്​ ഇക്കാര്യം തുറന്നടിച്ചത്​.

ബി.ജെ.പിയിലേക്ക്​ വരാൻ 90 ശതമാനം ചർച്ചയും പൂർത്തിയാക്കിയശേഷം പാർട്ടിയിലെ ക്വട്ടേഷൻ ഭയന്നായിരുന്നു പിന്മാറ്റം. ഭീഷണി വന്നത്​ ചില്ലറക്കാര്യമല്ലെന്ന്​ ജയരാജന്​ അറിയാം. പിന്മാറിയത്​ എന്തുകൊണ്ടാണെന്ന്​ മുഖ്യമന്ത്രിക്കും അറിയാം. ജയരാജനും​ ഭാര്യയും കുടുംബവും ജീവിച്ചിരിക്കണമെന്ന്​ തനിക്ക്​ ആഗ്രഹമുണ്ട്​.

വാട്​സ്ആപ്പിലൂടെ ജയരാജന്‍റെ മകനാണ്​ ആദ്യം ബന്ധപ്പെട്ടത്​. പ്ലീസ്​ നോട്ട്​ മൈ നമ്പർ എന്നായിരുന്നു ഉള്ളടക്കം. എന്നെ അറിയാത്ത കണ്ണൂരുകാരനായ ജയരാജന്‍റെ മകൻ എന്തുകൊണ്ടാണ്​ തന്‍റെ വാട്​​സ്ആപ്പിലേക്ക്​​ സന്ദേശം അയച്ചത്​?. 2023 ജനുവരി 18ന്​ എറണാകുളത്തെ ഹോട്ടലിൽവെച്ചാണ്​ ജയരാജന്‍റെ മകനെ കണ്ടത്​. ​അന്ന്​ ലിങ്ക്വിസ്റ്റിക്​ മോർച്ച സംസ്ഥാന ചുമതലക്കാരനായ, എറണാകുളത്ത്​ മത്സരരംഗത്തുണ്ടായിരുന്ന ടി.ജി. രാജഗോപാലും ഒപ്പമുണ്ടായിരുന്നു. ജയരാജനുമായി ഡൽഹിയിലെ കൂടിക്കാഴ്ചക്ക്​ ടിക്കറ്റ്​ അയച്ചുതന്നത്​ നന്ദകുമാറാ​ണെന്നും ​ടിക്കറ്റി​ന്‍റെ ഫോട്ടോസഹിതവുമുള്ള വാട്​​സ്​ആപ്​ സ​ന്ദേശവും മാധ്യമങ്ങൾക്ക്​ മുന്നിൽ കാണിച്ചു. 2023 ഏപ്രിൽ 24ന്​ ഡൽഹിയിലേക്ക്​ പോകാൻ എന്തിനാണ്​ ടിക്കറ്റെടുത്ത്​ അയച്ചതെന്ന് നന്ദകുമാർ​ വ്യക്തമാക്കണം.

​പേപ്പറുകൾ പൊക്കിപ്പിടിച്ച്​ രേഖയില്ലാത്ത ആരോപണമുന്നയിച്ച ടി.ജി. നന്ദകുമാറിനെ അറസ്​റ്റ്​ ചെയ്യണം. സി.പി.എം സംസ്ഥാന സെക്രട്ടറിയുടെ റോൾ ഏറ്റെടുത്താണ്​ നന്ദകുമാറിന്‍റെ പ്രവർത്തനം. സ്​ത്രീയെ വ്യക്തിപമായി അപമാനിക്കാനും അധിക്ഷേപിക്കാനുമാണ്​ ശ്രമിച്ചത്​. കുറേ കടലാസുകൾ കാണിച്ച്​ വിരട്ടാനായിരുന്നു ശ്രമം. സ്ത്രീക്കെതിരായ വ്യക്തിഹത്യ നടത്തിയ വിവാദ ഇടനിലക്കാരനെതിരെ മുഖ്യമന്ത്രിക്കും ഡി.ജി.പിക്കും പരാതി നൽകിയതായും അവർ പറഞ്ഞു.