സമൂഹ മാധ്യമ ഉപയോഗം ഉത്തരവാദിത്ത ബോധത്തോടെ വേണമെന്ന്​ ഹൈകോടതി

കൊച്ചി: സമൂഹം നേരിടുന്ന പ്രധാന ഭീഷണിയായി സൈബര്‍ കുറ്റകൃത്യങ്ങള്‍ മാറിയ സാഹചര്യത്തിൽ ഉത്തരവാദിത്ത ബോധത്തോടെ സമൂഹ മാധ്യമങ്ങളെ ഉപയോഗി​േക്കണ്ടത്​ കാലഘട്ടത്തി​​​െൻറ ആവശ്യമാണെന്ന്​ ഹൈകോടതി. സമൂഹ മാധ്യമങ്ങള്‍ ആശയവിനിമയത്തില്‍ വിപ്ലവം കൊണ്ടുവരികയും സമൂഹത്തിന് വലിയ പ്രയോജങ്ങളുണ്ടാക്കുകയും ചെയ്​തിട്ടുണ്ടെങ്കിലും വൻകിട കുറ്റകൃത്യങ്ങള്‍ ചെയ്യാനുള്ള അവസരങ്ങളും ഒരുക്കി​ക്കൊടുത്തി​ട്ടുണ്ടെന്ന്​ കോടതി ചൂണ്ടിക്കാട്ടി. ഇൻറര്‍നെറ്റില്‍ മതവിദ്വേഷം ജനിപ്പിക്കുന്ന രീതിയില്‍ കമൻറിട്ട  മലപ്പുറം മേലാറ്റൂര്‍ സ്വദേശി ബിജുമോ​​​െൻറ മുന്‍കൂര്‍ ജാമ്യ ഹരജി തള്ളിയാണ്​ ഉത്തരവ്​.

സ്വകാര്യ വാര്‍ത്ത വെബ്‌സൈറ്റിലെ വാര്‍ത്തയില്‍ മുസ്‌ലിംകള്‍ക്കെതിരെ വിദ്വേഷജനകമായ കമൻറിട്ടു എന്ന​ കേസിലാണ്​ ഹരജിക്കാരനെതിരെ മേലാറ്റൂർ പൊലീസ്​ കേസെടുത്തത്​. പ്രവാചകന്‍ മുഹമ്മദ് നബിയെക്കുറിച്ചും മോശം പരാമർശം നടത്തിയിരുന്നു. ഇന്ത്യന്‍ ശിക്ഷാനിയമത്തിലെ മതവിദ്വേഷം വളര്‍ത്തല്‍ (153എ) വകുപ്പ്​ പ്രകാരമാണ് പൊലീസ് കേസെടുത്തത്​. മതസൗഹാര്‍ദം തകര്‍ക്കാന്‍ ശ്രമിച്ചിട്ടില്ലെന്നും മുസ്‌ലിംകളെ അപകീര്‍ത്തിപ്പെടുത്താന്‍ ഉദ്ദേശിച്ചില്ലെന്നും ക്ഷമ ചോദിക്കുകയാണെന്നും ഹരജിക്കാരൻ ഹരജിയിൽ വ്യക്​തമാക്കി. മതവൈരം വളര്‍ത്തണമെന്ന രീതിയില്‍ പ്രവര്‍ത്തിക്കുന്ന ഒരു സംഘടനയിലും അംഗമല്ലെന്നും ബിജുമോന്‍ വാദിച്ചു. എന്നാൽ, ബോധപൂർവമാണ്​ ബിജുമോന്‍ ഈ പരാമര്‍ശങ്ങള്‍ നടത്തിയതെന്നും ഇത്​ സമൂഹത്തില്‍ വലിയ പ്രത്യാഘാതങ്ങളുണ്ടാക്കിയെന്നും ജാമ്യഹരജിയെ എതിർത്ത​ സർക്കാർ ചൂണ്ടിക്കാട്ടി.

മതനിരപേക്ഷ രാജ്യത്തെ അഭിപ്രായ സ്വാതന്ത്ര്യം മറ്റുള്ളവരുടെ മതവിശ്വാസത്തെയും വിശ്വാസങ്ങളെയും ഹനിക്കാനുള്ള സമ്പൂര്‍ണ ലൈസന്‍സല്ലെന്ന്​ കോടതി വ്യക്തമാക്കി. അവഹേളനാപരവും നിന്ദ്യവുമായ പരാമര്‍ശം നടത്തുന്നവര്‍ക്ക് അനുകൂലമായി നിലപാടെടുക്കാനാവില്ല. ഈ കമൻറുകള്‍ പ്രഥമദൃഷ്​ട്യാ നിന്ദ്യമാണെന്ന്​ കേസ് ഡയറി പരിശോധിച്ച കോടതി ചൂണ്ടിക്കാട്ടി. 

മുസ്‌ലിം മതവികാരം വ്രണപ്പെടണമെന്ന ഉദ്ദേശ്യത്തോടെ മുഹമ്മദ് നബിക്കെതിരെ ഇട്ട കമൻറ്​ ബോധപൂര്‍വമാണെന്ന്​ കരുതാം. വിദ്വേഷ ചിന്ത ഒരു മാനസിക അവസ്ഥയായതിനാല്‍ നേരിട്ടുള്ളതോ പ്രകടമായതോ ആയ തെളിവ്​ ലഭിക്കില്ല. സാഹചര്യ തെളിവ്​ വഴി മാത്രമേ ഈ കുറ്റം തെളിയിക്കാനാവൂ. എഫ്.ഐ.ആറില്‍ 295 എ വകുപ്പ് ഉള്‍പ്പെടുത്തിയിട്ടില്ല എന്നത് കേസ് തള്ളാനോ മുന്‍കൂര്‍ ജാമ്യം അനുവദിക്കാനോ കാരണമാവില്ല. അന്വേഷണത്തി​​​െൻറ ഘട്ടങ്ങളില്‍ അന്വേഷണ ഉദ്യോഗസ്ഥന് വേണ്ട വകുപ്പുകള്‍ ചേര്‍ക്കാമെന്നും കോടതി വ്യക്തമാക്കി.