സമൂഹമാധ്യമങ്ങളിലൂടെ വിസ തട്ടിപ്പ്: ഉത്തർപ്രദേശ് സ്വദേശി അറസ്​റ്റിൽ

കൊച്ചി: ഫേസ്ബുക്കിലൂടെയും വാട്ട്സ്​ആപ്പിലൂടെയും വിസ തട്ടിപ്പ് നടത്തിവന്ന ഉത്തർപ്രദേശ് സ്വദേശി അറസ്​റ്റിൽ. ഉത്തർപ്രദേശ് മീറത്ത്​ സ്വദേശി രവിസിങ് ടോമറാണ്​ (32) പിടിയിലായത്. രാജ്യവ്യാപകമായി നൂറുകണക്കിനുപേർ ഇയാളുടെ തട്ടിപ്പിനിരയായതായി പൊലീസ്​ പറഞ്ഞു. 

ഫേസ്ബുക്കിൽ ഇയാൾ തുറന്ന പേജുകണ്ട് ഇന്ത്യയുടെ വിവിധ ഭാഗങ്ങളിൽനിന്ന്​ യുവാക്കൾ ബന്ധപ്പെട്ടിരുന്നു. സിംഗപ്പൂരിൽ ജോലിയും ഉന്നത വിദ്യാഭ്യാസ കോഴ്സുകളിലേക്ക്​ പ്രവേശനവും വാഗ്ദാനം ചെയ്താണ്​ പണം പിരിക്കുന്നത്. ഇതിന്​ രണ്ടുലക്ഷം രൂപക്ക്​ മുകളിലാണ് ഈടാക്കിയിരുന്നത്. യാത്ര പുറപ്പെടുന്നതിന്​ മണിക്കൂറുകൾ മുമ്പാണ്​ വ്യാജ വിസ കൈമാറുന്നത്. ഇതോടൊപ്പം പണവും വാങ്ങും. വ്യാജ വിസയുമായി സിംഗപ്പൂരിൽ എത്തിയവരെ വിമാനത്താവളത്തിൽ​െവച്ചുതന്നെ അധികൃതർ ഇന്ത്യയിലേക്ക്​ മടക്കി അയച്ചിരുന്നു. ഇങ്ങനെയെത്തുന്നവരുടെ പാസ്​പോർട്ട് സിംഗപ്പൂർ അധികൃതരുടെ നിർദേശപ്രകാരം ഇന്ത്യയിലെ വിമാനത്താവളങ്ങളിൽ തടഞ്ഞു​െവക്കും.

സിംഗപ്പൂരിൽനിന്ന്​ തിരിച്ചയക്കുന്നതിന്​ ചെലവായ തുക അടച്ചാലേ പാസ്​പോർട്ട് തിരികെ നൽകൂ. ഈ വകയിലും ലക്ഷക്കണക്കിന്​ രൂപ ഉദ്യോഗാർഥികൾക്ക്​ നഷ്​ടപ്പെട്ടു. തട്ടിപ്പിനിരയായ ബംഗളൂരു സ്വദേശി കൊച്ചിയിലെ സുഹൃത്തുക്കൾ വഴി ജോലി ആവശ്യമുണ്ടെന്ന വ്യാജേന ഇയാളെ വിളിച്ചുവരുത്തി കുടുക്കുകയായിരുന്നു. എറണാകുളം സെൻട്രൽ പൊലീസാണ് അറസ്​റ്റ് ചെയ്തത്. കോടതി റിമാൻഡ് ചെയ്തു.